د اتریش صدراعظم کرستیان سټاکر وايي، افغانستان ته د یو بل کس د اخراج پرېکړه ښيي چې په اتریش کې د هغو خلکو لپاره هیڅ زغم نشته چې «زموږ په هېواد کې پناه غواړي، خو بیا جرمونه کوي». نوموړی زیاتوي« هر څوک چې زموږ له قوانینو سرغړونه وکړي، باید له دغه هېواده ووځي».
نوموړي دا څرګندونې د یکشنبې په ورځ پر خپل اېکس کړې دي.
د پاکستان بهرنیو چارو وزارت په استانبول کې له طالبانو سره د مذاکراتو له پای ته رسېدو وروسته یوه اعلامیه کې وویل، چې د «طالبانو یو شمېر عناصر په پاکستان کې پښتون نشنلیزم ته په لمن وهلو» د پاکستان په کورنیو مسایلو کې لاسوهنه کوي. یاد وزارت یوځل بیا له ټي ټي پي سره خبرې رد کړې دي.
د پاکستان د بهرنیو چارو وزارت نن د یکشنې په ورځ، د لړم ۱۸مه په یوه اعلامیه کې وویل، چې پاکستان تل مذاکراتو ته چمتو دی او تمه یې لرله، چې د افغانستان خاوره به دپاکستان پرضد بریدونو لپاره ونه کارول شي.
په اعلامیه کې راغلي، چې د طالبانو یو شمېر عناصر په پاکستان کې پښتون نشنلیزم ته لمن وهي، خو نور وضاحت یې نه دی ورکړی.
اعلامیه زیاتوي:« د طالبانو رژیم دننه عناصر هڅه کوي، چې په پاکستان کې د پښتون نشنلیزم راپارولو له لارې د پاکستان په کورنیو چارو کې لاسوهنه وکړي، خو حقیقت دادی، چې په پاکستان کې پښتانه د ټولنې او دولت یو فعاله برخه ده».
پاکستان ویلي، چې تر افغانستان په یاد هېواد کې د پښتنو شمېر ډېر دی او افغان طالبان دې د خپل حکومت په جوړښت کې خپل خلک شامل کړي.
په اعلامیه کې افغان طالبانو ته په اشاره ویل شوي، چې د ټي ټي پي او بلوڅ وسله والو په ګډون یو شمېر نورې ډلې د پاکستان دښمنې ډلې دي او یادو ډلو ته پناه ورکوونکي او مالي ملاتړ کوونکي یې د پاکستان ملګري نه ګڼل کېږي.
پاکستان خبرداری ورکړی، چې د خپلو خلکو او ګټو د خدیتوب لپاره به هر ممکن اقدام وکړي.
د پاکستان د بهرنیو چارو وزارت ویلي، چې افغان طالبانو د قطر او استانبول د مذاکراتو پر مهال یوازې د لنډمهالي اوربند غځولو لپاره علاقمندي لرله، خو د ټي ټي پي او نورو وسله والو ډلو پر وړاندې یې د عملي ګام پورته کولو لپاره لېوالتیا نه درلوده.
طالبانو په خپلو اعلامیو کې ویلي، چې دوی له پاکستان سره همکارۍ ته چمتو دي، خو د ټي ټي پي مساله د پاکستان کورنۍ مساله ده او دوی د پاکستان د امنیت تضمین نه شي ورکولای.
د پاکستان د بهرنیو چارو وزارت په اعلامیه کې ویل شوي:«د پاکستان اصلي اندېښنې د حل پر ځای، طالبان پر پاکستان له تورونو او جګړه ییزو ویناوو استفاده کوي. دوی مذاکرات اوږده کړل او په بې معنا شخړو کې ښکیل شول، څو د مشخصې هوکړې رامنځته کېدو مخه ونیسي».
د پاکستان د بهرنیو چارو وزارت ویلي، چې افغان طالبانو پاکستاني جنګیالیو ته د پناه ورکولو مساله د بشري ستونزې په توګه وړاندې کړې ده او ادعا کوي، چې په ۲۰۱۴ او ۲۰۱۵ کال کې د پاکستان د پوځي عملیاتو له امله افغانستان ته تللي کډوال نه بلکې «ترهګر» دي، چې طالبانو ورته پناه ورکړې او هغوی په پاکستان کې ترهګریز فعالیتونه ترسره کوي.
پاکستان ویلي، چې له افغان طالبانو یې په افغانستان کې د مېشتو پاکستاني وګړو د ورسپارلو غوښتنه کړې، خو طالبانو یې یاده غوښتنه رد کړې ده.
د پاکستان د بهرنیو چارو وزارت په اعلامیه کې لیکل شوي:«پاکستان چمتو دی، چې په افغانستان کې مېشتو پاکستانیانو کورنۍ په چمن یا تورخم کې ور وسپارل شي.»
پاکستان ویلي، چې له کابل سره یې د خبرو دروازې خلاصې دي، خو له افغان طالبانو پرته به له بلې هېڅ ډلې سره خبرې او مذاکرات ونه کړي.
پاکستان ویلي، چې د خپلو داخلي ستونزو د هوارۍ وړتیا لري، خو طالبان دې د پاکستان ضد بریدونو له ملاتړ او همکارۍ لاس واخلي.
د پاکستان د بهرنیو چارو وزارت داسې مهال پر طالبانو د پښتون نشنلیزم د تحریکولو تور لګوي، چې په دې وروستیو کې په دغه هېواد کې د پښتنو سیاسي ګوندونو او غورخنګونو د نارضایتۍ کچه لوړه شوې او په مختلفو سیمو کې د پوځي عملیاتو خلاف غوندې او د امن پاڅونونه شوي دي.
وړمه ورځ د عمران خان په مشرۍ د تحریک انصاف ګوند د خیبر پښتونخوا ایالت والي سهیل اپریدي له پوځي عملیاتو سره مخالفت وکړ او ویې ویل، چې دغه عملیات د ستونزې حل نه دی.
د طالبانو د صنعت او سوداګرۍ وزارت وایي، له پاکستان سره د سوداګریزو لارو له تړلکېدو وروسته، د افغانستان صادرات له بدیلو لارو روان دي. د یاد وزارت ویاند وايي، چې دا مهال د چابهار بندر له لارې عربي هېوادونو او هند ته د افغانستان مېوې او کورني تولیدات صادرېږي.
د طالبانو د سوداګرۍ وزارت ویاند د دې ډلې اړوند امید راډيو ته ویلي، چې پر چابهار سربېره د تاجکستان، ازبکستان او ترکمنستان له لارو هم د منځنۍ اسیا او اروپايي هېوادونو ته د افغانستان د تازه مېوو صادرات روان دي.
عبدالسلام جواد همداراز ویلي چې د صنعت او سوداګرۍ وزیر بېلابېلو هېوادونو ته د سفرونو پرمهال هڅې پیل کړې، چې د افغانستان صادراتو ته نوي نړیوال بازارونه پیدا کړي.
د افغانستان او پاکستان ترمنځ د تاوتریخوالي له کبله پاکستاني لوري له افغانستان سره ټولې لارې د هر ډول تګ راتګ پر مخ تړلې دي، چې له امله یې د دواړو خواوو سوداګرو ته درانده زیانونه اوښتي.
پر چابهار بندر د امریکا د بندیزونو معافیت یوځل بیا د سوداګرۍ لپاره ددغه بندر په تړاو د افغان سوداګرو هیلې غوړولې دي.
متحده ایالاتو په همدې میاشت کې له بندیزونو د چابهار بندر شپږمیاشتنی معافیت اعلان کړی دی.
د طالبانو د کورنیو چارو وزارت د نشه يي توکو پر وړاندې د مبارزې معین ویلي، چې د تېر جمهوري نظام لوړپوړو چارواکو د نشه يي توکو په قاچاق کې لاس درلود او بهرنیو هېوادونو ته یې قاچاق کاوه.
د طالبانو د کورنیو چارو وزارت د نشه يي توکو پروړاندې د مبارزې معین محمد قاسم خالد د یکشنبې په ورځ په کابل کې د ۲۰۰زره کیلو ګرامه نشه يي توکو سوځولو پرمهال ويلي، چې د یادو نشه يي توکو د قاچاق او پلور په تور یې ۷۵۰ کسان نیولي دي.
نوموړي ویلي، چې په یادو نشه يي توکو کې، شیشه، چرس، نشه يي ټابلیټ، هیرویین، تاریاک، بنګ دانه او تیزاب شامل دي.
یاد طالب چارواکي پرداسي مهال د نشه يي توکو په قاچاق کې د تېر جمهوري نظام د لوړپوړو چارواکو د لاس لرلو ادعا کړې، چې د راپورونو له مخې، په کندهار، هلمند، فراه او نیمروز ولایت کې د نشه يي توکو د پروسس ګڼې کارخونې د یادې ډلې د لوړپوړو چارواکو اړوند دي.
له دې وړاندې نړیوالو سازمانونو د طالبانو مشران د نشه يي توکو په قاچاق کې ښکیل ګڼلي او ددوی د جګړې د تمویل یوه مهمه سرچینه یې د نشه يي توکو قاچاق باله.
د ترکیې ولسمشر رجب طیب اردوغان ویلي، چې د یاد هېواد د بهرنیو چارو وزیر هاکان فیدان، د دفاع وزیر یاسر ګولر او د استخباراتو رییس ابراهیم کالین راتلونکې اونۍ د طالبانو او پاکستان ترمنځ د شخړې هواري په موخه اسلام اباد ته سفر کوي.
اردوغان دا څرګندونې د یکشنبې په ورځ له اذربایجان څخه د راستنېدو پر مهال کړې دي.
دا په داسې حال کې ده، چې د طالبانو او پاکستان ترمنځ د قطر او ترکیې په منځګړیتوب درې پړاوه مذاکرات ترسره شوي دي، خو د یادو مذاکراتو پرمهال له اوربند پرته نورې کومې پایلې ته نه دي رسیدلي.
د طالبانو د اطلاعاتو او کلتور وزير د جاپان له سفیر سره د همکاريو او فرهنګي میراثونو د ساتنې په اړه خبرې کړې دي. شير احمد حقاني ویلي، چې افغانستان د ملي موزيم او د تاريخي اثارو او ابدو د ساتنې په برخه کې د جاپان د لا زياتو همکاريو هيله لري.
د طالبانو د اطلاعاتو او کلتور وزارت نن یکشنبه، د لړم ۱۸مه، د یوې اعلامیې په خپرولو سره ویلي، چې د جاپان سفیر ماساموتو کینیچي ددې ډلې د اطلاعاتو او کلتور له وزير شير احمد حقاني سره د وزارت مقام کې وکتل.
په دې لیدنه کې د جاپان سفیر ویلی، چې له زلزله ځپلو سره بشري مرستو ته دوام ورکوي.
نوموړی زیاتوي، چې د جاپان د افغانستان د ثبات لپاره هڅې کوي او بشري مسایل له سياسي موضوعاتو سره نه تړي.
ماساموتو کینیچي د افغانستان د رسنيو پر وضعيت هم خبرې کړې دي او له ملي موزيم سره یې د هر راز همکارۍ ډاډ ورکړی دی.
نوموړي زیاته کړې، چې توکیو د طالبانو له اطلاعاتو او کلتور وزارت سره په ګډه د فرهنګي ميراثونو د ساتنې لپاره ژمن دی او دې برخې ته ځانګړی ارزښت ورکوي.
په دې لیدنه کې د طالبانو د اطلاعاتو او کلتور وزیر شیر احمد حقاني ویلي، چې د جاپان او افغانستان ولسونه تاريخي او ژورې اړيکې لري او له افغان ولس سره د جاپان مرستې صادقانه او له سياسي اهدافو جلا دي.
د یادونې وړ ده، چې د طالبانو اطلاعاتو او کلتور وزارت د سفیر د لیدنې هېڅ انځور نه دی خپور کړی او یوازې یې د لیدنې اعلامیه خپره کړې ده.