د هانګکانګ د وانګ فوک کورټ سیمې په لوړو استوګنیزو ودانیو کې د پراخې اورلګېدنې له امله ۱۴۶ کسان مړه او شاوخوا ۴۰ کسان تري تم دي. دغه اورلګېدنه چې په تېرو ۷۵ کلونو کې د هانګکانګ تر ټولو وژونکې پېښه وه؛ سلګونه کسان یې بېکوره کړل چې اوس په لنډمهاله پنډغالو کې ژوند کوي.
د دغه وژونکې او اوږدمهاله اور لګېدنې لامل لا هم نهدی په ډاګه شوی.
د ایران ولسمشر د یکشنبې په ماښام په تهران کې د ترکیې له بهرنیو چارو وزیر سره په کتنه کې وویل، په داسې مهال کې چې د مسلمان ملتونو ګډ دوښمنان د فشارونو د زیاتولو په لټه کې دي، نو اسلامي هېوادونو ته هم پهکار ده، چې یو بل ته شرایط اسانه او له پېچلي کولو یې ډډه وکړي.
د ایران د ولسشمرۍ ماڼۍ د خبرپاڼې لهمخې، مسعود پزشکیان په دې کتنه کې چې د یکشنبې په ماښام (د لیندۍ ۹مه) ترسره شوه، وویل: «ایران او ترکیه سره وروڼه دي او لازمه ده چې په خپلو کې اړیکې پراخې کړي او باوري یو له هغو پولو چې سوداګري، علم او کلتور تېرېږي، هېڅکله به هم ترهګري او وسلې ونهاړول شي.»
پزشکیان همداراز په ډاګه کړه، که اسلامي هېوادونه سره یو موټي وي، نو په نړۍ کې به هېڅ داسې قدرت نهوي چې مسلمان ملتونو ته ستونزې جوړې کړي.
د ترکیې د بهرنیو چارو وزیر هاکان فېډان وویل، په اوسنیو شرایطو کې اسلامي هېوادونه باید په ګډه او همغږې توګه خپلې همکارۍ پراخې کړي او همداراز یې په ډاګه کړه، چې د ایران او ترکیې په ګډون اسلامي هېوادونه کولی شي د اسلامي امت پر وړاندې شته اختلافونه لري کړي.
د امریکا مرکزي قوماندانۍ (سېنټکام) د یکشنبې په ورځ وویل، چې تېره اوونۍ یې د سوریې په سوېل کې د داعش د وسلو د ساتنې ۱۵مرکزونه له منځه وړي دي.
د امریکا د مرکزي قوماندانۍ (سېنټکام)په وينا، دوی او سوریایي ځواکونو د نومبر له ۲۴مې تر ۲۷مې پورې د رېف دمشق په ولایت کې د هوايي بریدونو او ځمکنیو چاودنو له لارې دا مرکزونه پېژندلي او ویجاړ کړي دي.
په هغه خبرپاڼه کې چې سېنټکام خپره کړې، ویل شوي: «په ګډو عملیاتو کې له ۱۳۰ څخه زیات هاوان او راکټونه، ګڼ شمېر برید کوونکې وسلې، ماشینګڼې، د ټانک ضد ماینونه او د بمونو د جوړولو مواد له منځه یووړل شول.»
داعش وسلهواله ډله چې یو وخت یې په سوریه او عراق کې پر میلیونونو خلکو سخت افراطي حاکمیت تپلی و، څو کاله مخکې د امریکا په مشرۍ د نړۍوال اېتلاف له خوا سخته وځپل شوه؛ خو بیا هم وتوانېده چې ځان بیا منظم او پیاوړی کړي.
د سېنټکام د سمندري ځواکونو لوړپوړي قوماندان براډ کوپر وویل، چې دا عملیات به د داعش پر ضد ترلاسه شوې بریاوې "دایمي او ثابتې" کړي.
د امریکا ولسمشر ډونالډ ټرمپ د نومبر په ۱۰مه له سوریایي ولسمشر احمد الشرع سره چې یو وخت د القاعدې پخوانی قوماندان و او تر دې وروستیو پورې د امریکا د بندیزونو لاندې و تر خبرو وروسته وویل، چې د سوریې د بریا لپاره به هر ډول هڅه وکړي.
سوریایي حکومت هغه وخت ویلي وو، چې د دغو خبرو له پیل مخکې یې په ټول هېواد کې د داعش د پټو مرکزونو پر ضد مخکېني عملیات ترسره کړي دي.
په واشنګټن کې له ټرمپ سره په لیدنه کې د الشرع یو اساسي هدف دا و، چې د امریکا هغه سخت بندیزونه چې پر هېواد یې لګېدلي، په بشپړ ډول لرې شي.
د لیدنې په جریان کې د امریکا د خزانې وزارت اعلان وکړ، چې د قیصر بندیزونو د تطبیق ځنډول به د ۱۸۰ورځو لپاره نور هم تمدید کړي، خو د دغو بندیزونو بشپړ لرې کېدل یوازې د امریکا د کانګرس صلاحیت دی.
امریکايي او اوکرایني چارواکو د یکشنبې په ورځ (د لیندۍ ۹مه) په فلوریډا کې یوه مهمه ناسته وکړه، څو د سولې پر هغې طرحې بحث وکړي چې ټاکل شوې د اوکراین او روسیې ترمنځ د جګړې پای ته رسېدو لپاره لار هواره کړي.
په دې ناسته کې د اوکراین د امنیت شورا رییس رستم عمروف د اوکراین د مرکچي پلاوي مشري کوله او له امریکایي لوري استیو ویتکاف او جارډ کوشنر په دې ناسته کې حاضر وو. ویل کېږي، چې ویتکاف به په راتلونکو ورځو کې د روسیې له چارواکو سره هم وګوري.
د امریکا د بهرنیو چارو وزیر مارکو روبیو وویل، هیله لري چې دغه خبرې به د درې کلنې جګړې د ختمېدو لپاره د عملي پرمختګ سبب شي. د ده په وینا، هدف دا دی چې اوکراین په خپلواکه او باثباته بڼه پاتې شي.
دغه ناسته وروسته له هغه ترسره کېږي، چې د امریکا له لوري د سولې نوې طرحې په اړه دوه اوونۍ پرلهپسې خبرې روانې وې. دا طرحه تر ډېرو نیوکو لاندې راغله او منتقدین یې روسیې ته د امتیاز ورکولو په معنا ګڼي.
بلخوا، د اوکراین ولسمشر ولادیمیر زېلېنسکي هیله څرګنده کړې چې د جنیوا تېرې ناستې پرېکړې به ژر وروستۍ شي.
د بدخشان ځايي سرچینو افغانستان انترنشنل ته ویلي، چې د یکشنبې په ماښام (د لیندۍ ۹مه) د بدخشان ولایت د مایمي ولسوالۍ د رضوي کلي د تاجکستان شادک مرزي سیمه کې پر دوو چینايي وګړو برید شوی دی.
سرچینې وايي، یادو دوو چینايي وګړو د دې سیمې د سړک جوړولو په پروژو کې کار کاوه او پرې د سپکو وسلو ډزې شوې دي.
د چین، تاجکستان او طالبانو د بهرنیو چارو وزارتونو تر اوسه په رسمي ډول په دې اړه څه نه دي ویلي.
تر دې مخکې د چهارشنبې په ورځ هم د تاجکستان د ختلان ولایت په یوه سیمه کې درې چینايي وګړي د افغانستان له خاورې د ډرون په برید کې وژل شوي وو.
د تاجکستان د بهرنیو چارو وزارت د پنجشنبې په ورځ ویلي و، چې د افغانستان له خاورې څخه د ختلان ولایت د سرحدي سیمې په شاوخوا کې د «شاهین اېساېم» د سرو زرو د استخراج شرکت پر کاري ځای برید شوی، چې په پایله کې یې درې چینايي کارکوونکي وژل شوي دي.
د طالبانو د بهرنیو چارو وزارت د جمعې په ورځ د تاجکستان پر پوله د چینايي وګړو وژل کېدل غندلي. یاد وزارت ویلي، چې د ابتدایي ارزونو او د طالبانو د اړوندو ادارو د معلوماتو له مخې دا پېښه د هغو ډلو کار دی، چې د سیمې د هېوادونو ترمنځ د ګډوډۍ، بې ثباتۍ او بې باورۍ د رامنځته کېدو هڅې کوي.
د اسراییل صدراعظم بنیامین نتنیاهو د یکشنبې په ورځ د دغه هېواد له ولسمشر نه د فساد محکمې په تړاو د بښنې غوښتنه کړې، ځکه نوموړي ویلي، چې دغه قضیه یې د حکومتولۍ وړتیا کمزورې کوي او بښنه د اسراییل په ګټه ده.
نتنیاهو، چې د اسراییل د تاریخ تر ټولو ډېر پر واک کې پاتې شوی صدراعظم دی، له ډېر وخته د بډو، درغلیو او د عامه باور د ماتولو له تورونو سره مخ دی.
د هغه وکیلانو د ولسمشر دفتر ته په استول شوي لیک کې ویلي چې صدراعظم لا هم باور لري چې قضایي بهیر به دده په بشپړ سپیناوي پای ته ورسېږي.
نتنیاهو په یوه لنډه ویډیو کې ویلي، «نن مې وکیلانو د هېواد ولسمشر ته د بښنې غوښتنه لېږلې. زه تمه لرم هر څوک چې د هېواد خیر غواړي، ددغه ګام ملاتړ به وکړي».
د ولسمشر اسحاق هېرتزوګ دفتر د یکشنبې په لومړیو ساعتونو کې اعلان وکړ چې غوښتنه ترلاسه شوې او د وکیلانو لیک یې خپور کړ.
د متحده ایالاتو ولسمشر ډونالډ ټرمپ د همدې میاشتې په پیل کې هېرتزوګ ته لیک استولی و او ترې غوښتي یې و چې صدراعظم ته د بښنې کولو په اړه غور وکړي.
د هېرتزوګ دفتر وویل چې غوښتنه به د عدلیې وزارت د بښنو څانګې ته وسپارل شي.
په لیک کې د نتنیاهو وکیلانو استدلال کړی چې د هغه پر ضد جنایي قضیې د ټولنې وېش ژور کړی او د ملي پخلاینې لپاره د محکمې پای ته رسول ضروري دي. دوی لیکلي چې ورځ په ورځ ډېرېدونکې محکمې د صدراعظم د حکومتولۍ په وخت کې درنې او ستونزمنې دي.
نتنیاهو په خپل پیغام کې وویل، « زه مجبور یم په اونۍ کې درې ځله محکمه کې حاضر شم، دا یو ناممکن شرط دی».
هغه ټینګار وکړ چې د خلکو باور یې د پرلهپسې انتخاباتي بریاوو له لارې ترلاسه کړی دی.
نه صدراعظم او نه یې وکیلانو د جرم منلو په تړاو څه څرګندونه کړې ده.