د ملګرو ملتونو پراختیايي پروګرام(یو اېن ډي پي) په خپل تازه راپور کې ویلي چې د طالبانو لخوا پر افغان ښځو د پراخو محدودیتونو سربېره، ډېری افغان ښځې د کوچنیو کاروبارونو له لارې نه یوازې خپله عایداتي سرچینه ساتلې، بلکې لسګونو نورو ښځو ته یې هم د کار زمینه هم برابره کړې ده.
د ملګرو ملتونو د پراختیايي پروګرام د راپور له مخې، کوچني کاروبارونه دا مهال د افغان ښځو لپاره د اقتصادي فعالیت یوازینۍ پاتې لاره ده.
یو اېن ډي پي ویلي، چې په افغانستان کې یې له څه باندې ۸۹ زره کوچنیو کاروبارونو ملاتړ کړی، چې ۹۱ سلنه یې د ښځو لهخوا پر مخ وړل کېږي او تر اوسه یې له ۴۳۹ زرو څخه زیات کاري فرصتونه یې رامنځته کړي دي.
د دغه ادارې د معلوماتو له مخې، یوازې څلور سلنه افغان ښځې نړیوالو بازارونو ته لاسرسی لري او د پور ترلاسه کول هم د څو تضمین کوونکو د اړتیا له امله د ډېرو لپاره ستونزمن دي.
د ملګرو ملتونو دغه ادارې اندیښنه څرګنده کړې چې که څه هم افغان ښځې د اقتصادي بقا لپاره هڅې روانې ساتي، خو د نجونو د زدهکړو محدودیت او د مالي زدهکړو نشتوالی د دې کاروبارونو راتلونکی له جدي ګواښ سره مخ کولای شي.
یو اېن ډي پي په پای کې د افغان ښځو دغه فعالیتونه ستایلي او ویلي دي چې له ننګونو سره سره، بیاهم افغان ښځې هڅه کوي چې په ټولنه کې خپل رول وساتي او له عامه ژوند څخه د بشپړ حذف کېدو مخه ونیسي.
که څه هم اوس مهال ښځې په دولتي ادارو، نادولتي بنسټونو او حتی د ملګرو ملتونو په ادارو کې له کار کولو منع دي، خو بیا هم ډېرو ښځو په هغو دودیزو برخو کې خپل فعالیت ته دوام ورکړی چې ټولنیز منل شوي ګڼل کېږي، لکه ګنډل، غالۍ اوبدل، د خوړو تولید او د ښځو ځانګړي رستورانتونه.
