د امریکا ولسمشر اعلان وکړ، د اسراییل له لومړي وزیر سره یې لیدنه چې د دوشنبې ماښام په سوېلي فلوریډا کې پیل شوه، له لومړیو شېبو راهیسې «د پام وړ پرمختګونو» سره مل وه. د هغه په وینا، د دواړو لوریو ترمنځ څو مهم اختلافات همداسې د خبرو په پیل کې حل شول.
ډونالډ ټرمپ وایي: «موږ همدا اوس ډېر پرمختګ وکړ. شاوخوا پنځه دقیقې مو غونډه وکړه او په همدې موده کې مو نږدې درې ستونزمن موارد حل کړل.»
د امریکا ولسمشر مخکې ویلي وو، چې په دې لیدنه کې به له نتنیاهو سره د «پنځو مهمو موضوعاتو» په اړه خبرې وکړي.د ځایي خبریالانو د راپور لهمخې، په دې ناسته کې د امریکا پلاوی د ټرمپ د ادارې له یو شمېر لوړپوړو چارواکو او نږدې کسانو جوړ و.د سپینې ماڼۍ د دفتر مشر سوزي وایلز، د امریکا د بهرنیو چارو وزیر مارکو روبیو، د دفاع وزیر پیټ هېګسټ، د ټرمپ زوم جورډ کوشنر، د سپینې ماڼۍ د دفتر مرستیال ډن اسکاوینو او د ټرمپ ځانګړی استازی سټيو وېټکاف د دې پلاوي غړي ول.
