د امریکا ولسمشر ډونالد ټرمپ د اسراییل د لومړي وزیر بنیامین نتنیاهو په حضور کې د ایران پروړاندې سخت دریځونه وښودل او ویې ویل، که تهران خپل بالسټیک توغندیز یا اټومي پروګرام ته دوام ورکړي، امریکا به له پوځي اقدام څخه ملاتړ وکړي.
ټرمپ پر ایران د اسراییل د برید د ملاتړ په اړه د یوه خبریال د پوښتنې په ځواب کې وویل: «که دوی خپل توغنديز پروګرام ته دوام ورکړي؟ هو. اټومي پروګرام؟ سمدستي.»هغه زیاته کړه، په یوه مورد کې به «له شک پرته مثبت ځواب» ورکړي او په بل مورد کې «سمدستي اقدام» کېږي.د امریکا ولسمشر همدارنګه د هغو راپورونو په یادولو سره چې ګواکې ایران هڅه کوي خپل پوځي توان بېرته ورغوي، وویل: «ما اورېدلي چې ایران بیا ځان پیاوړی کوي. که داسې وکړي، موږ به اړ شو چې یو ځل بیا هغوی وځپو او سخت به یې ووهو.»ټرمپ همدارنګه وویل، چې ایران د یوې هوکړې په لټه کې دی او ټینګار یې وکړ، چې هوکړه به د ایران لپاره «عاقلانه انتخاب» وي.هغه زیاته کړه، ایران د امریکا او اسراییل له وروستیو بریدونو وړاندې کولی شول یوې هوکړې ته داخل شي، خو دا کار یې ونهکړ او اوس «افسوس کوي چې کاش هغه هوکړه یې کړې وای.»ټرمپ د ایران د حکومت د نسکورولو د ملاتړ په اړه د یوې پوښتنې په ځواب کې وویل، چې د «حکومت پر نسکورولو» خبرې کول نه غواړي، خو د ایران کورنی وضعیت یې بحراني وباله.هغه د ایران د شدید انفلاسیون او اقتصادي وضعیت په یادولو سره وویل: «دوی اقتصادي ګډوډۍ سره مخ دي او خلک راضي نهدي.»
