د طالبانو تر واک لاندې ملي ټلوېزیون خبر ورکړی، چې په فراه ولایت کې د یادې ډلې د صنعت او سوداګرۍ ریاست د «وهاج» په نوم له یوه خصوصي شرکت سره په ګډه د کورنیو تولیداتو درې ورځنی نندارتون جوړ کړی دی.
د یاد نندارتون مسوولینو ویلي، په دغه نندارتون کې یې ۵۰ غرفې صنعتکارانو ته ځانګړې کړې وې چې پهکې د خوراکي توکو، غاليو، کرنیزو محصولاتو او د مېنځلو توکو بېلابېل ډولونه نندارې ته وړاندې شوي وو.
راپور زیاتوي، چې فراه ولایت د کیمیاوي کوډ، غیر الکولي مشروباتو او د مېنځلو توکو په تولید کې د ځانبساینې کچې ته رسېدلی دی. د نندارتون د مسوولینو په وینا؛ د دغه نندارتون موخه د کورنیو تولیداتو په اړه د عامه پوهاوي لوړول او پر بهرنیو وارداتو د خلکو د اتکاء کمول دي.
