د طالبانو تر کنټرول لاندې د کډوالو ستونزو ته د رسېدنې عالي کمېسیون راپور ورکړی، یوازې د یکشنبې په ورځ د افغانستان له بېلابېلو لارو نږدې ۲۰۴۸ افغانان اړ اېستل شوي چې افغانستان ته ستانه شي. طالبان وایي دغه کډوالو سره یې په بېلابېلو برخو کې مرستې کړې دي.
د دغه کمېسیون د راپور له مخې؛ دغه کډوال د ننګرهار د تورخم، د کندهار د سپین بولدک، د هلمند د بهرامچې، د هرات د اسلامکلا او د نیمروز د ورېښمو پله له لارې ستانه شوي دي. په راپور کې راغلي، د یکشنبې په ورځ د ننګرهار د تورخم له لارې ۳۳۰ کورنۍ چې ټولټال۱۷۵۶ کسان کېږي، افغانستان ته ستانه شوي دي. همدا ډول د کندهار د سپین بولدک له لارې ۱۶۷ کسان، د هلمند د بهرامچې له لارې ۱۰۲ کسان، د هرات د اسلام کلا له لارې ۱۰ او د نیمروز د ورېښمو پله له لارې ۱۳ کسان افغانستان ته ستانه شوي دي.
له بل پلوه د طالبانو تر واک لاندې د کډوالو ستونزو ته د رسېدنې عالي کمېسیون غړي مولوي احمدالله وثیق ویلي، د سوړ ژمي سره، سره له پاکستان او ایران نه د افغان کډوالو د جبري اېستلو بهیر دوام لري. د هغه په وینا؛ په تېرو شپږو میاشتو کې ټول ۱،۷ مېلیونه افغانان هېواد ته ستانه شوي دي.
