په ننګرهار کې د طالبانو رسنیز دفتر دوشنبه د (مرغومې ۲۹مه) خبر ورکړی، چې په دې ولایت کې د دغه ډلې د المپیک، بدني روزنې او ورزش ریاست له لوري ۴۶۵ورزشکارانو ته د «فکري اصلاح، اسلامي او ملي روحیې» په تړاو سېمینار ورکړی دی.
دې ولایت کې د طالبانو د ورزش رییس عبدالسلام ویلي، د دغه سېمینار موخه دا وه، څو ورزشکاران له اسلامي او ملي روحیې څخه برخمن شي.
هغه زیاته کړې، ورزشکاران باید مسلکي او باخلاقه وي. طالبانو همدا راز ټینګار کړی، چې دغه ناسته کې یې ورزشکارانو ته شرعي اصول او په اسلام کې د ورزش ارزښتونه روښانه کړي دي.
دا لومړی ځل نه دی چې طالبان ورزشکارانو ته دغه ډول پروګرامونه برابروي، بلکې تر دې وړاندې یې هم ورته ناستې چمتو کړې دي.
هممهاله بیا پر کابل واکمنو افغانستان کې پر یو شمېر ورزشونو بندیزونه هم لګولي او ښځې یې له هر ډول ورزشي لوبو څخه منع کړي دي.
