په بلخ کې د طالبانو د صنعت او سوداګرۍ ریاست وایي، د روان کال له پیل راهیسې په دغه ولایت کې ټولټال ۸۵۶ سوداګریز او صنعتي جوازونه وېشل شوي چې له دې ډلې ۲۸۴ نوي او پاتې ۵۷۲ نور تمدید شوي جوازونو دي.
د یاد ریاست مرستیال نصیر احمد نیازی وایي: «په روان کال کې زموږ ریاست د سوداګرۍ او صنعت په برخه کې ۸۵۶ جوازونه ورکړي دي، چې ۵۷۲ جوازونه تمدیدي او ۲۸۴ جوازونه نوي دي».
هغه زیاته کړه، چې د نويو جوازونو ورکول به د سوداګرۍ او تولید په پراختیا کې مرسته وکړي او د سوداګرو او صنعتکارانو هڅونې ته به لار هواره کړي.
په ورته وخت کې د بلخ ولایت یو شمېر صنعتکاران وایي، که ورته د برېښنا او نورو اړینو اسانتیاوو برابرول یقیني شي؛ نو دوی به په بېلابېلو برخو کې خپل تولیدي فعالیتونه ګړندي کړي. د صنعتکارانو په خبره؛ د جوازونو وېش د سوداګرۍ پراختیا لپاره مثبت ګام دی، خو د تولیدي چاپېریال او زېربناوو نشتوالی د هغوی د فعالیتونو مخه نیسي.
