د افغانستان کرېکټ ملي لوبډلې وېسټانډيز ته د ۳۸ منډو په توپیر ماتې ورکړه
د افغانستان کرېکټ ملي لوبډلې په لومړۍ شل اوریزه نړۍواله سیالۍ کې وېسټانډيز ته د ۳۸ منډو په توپیر ماتې ورکړه. د دغه سریز دویمه او درېیمه سیالۍ به د سلواغې په لومړۍ او دویمه په متحده عربي امارات کې ترسره شي.
د افغانستان کرېکټ بورډ د دوشنبې په ماخوستن (د مرغومي ۲۹مه) د یوې خبرپاڼې په خپرولو سره ویلي، د دغې سیالۍ پچه افغان لوبډلمشر راشد خان وګټله او لومړی یې هم د توپوهنې پرېکړه وکړه.
افغان اتلانو په شلو اورونو کې د خپلو درېیو لوبغاړو په زیان سره ۱۸۱ منډې جوړې کړې او سیالې وېسټانډیز ته یې د ۱۸۲ منډو هدف وټاکه. د افغان لوبډلې په ګټه ابراهیم ځدراڼ ۸۷ او دروېش رسولي ۸۴ منډې جوړې کړې.
وېسټانډيز لوبډلې په شلو اورونو کې د ۹ لوبغاړو په زیان سره اېله ۱۴۳ منډې جوړې کړې او بالاخره لوبه یې د ۳۸ منډو په توپیر افغان اتلانو ته وسپارله.
د یادونې وړ ده، چې د دغه سریز دویمه لوبه به د سلواغې په لومړۍ او درېیمه لوبه به د سلواغې په دویمه په متحده عربي اماراتو کې ترسره شي.
