په هلمند کې ځايي طالبانو د موسیقۍ ډول ډول الات، قلیون او یو شمېر نور وسایل وسوځول. دغه وسایل د هلمند لپاره د طالبانو د امربالمعروف او نهې عن المنکر ریاست له لوري په تېرو ۸ میاشتو کې راټول شوي وو. طالبانو ویلي، دا یې ځکه سوځولي چې د خلکو لهخوا په «منکراتو» کې استعمالېدل.
د هلمند ولایت لپاره د طالبانو د رسنیو دفتر د دوشنبې په ورځ (د مرغومي ۲۹مه) په خپره شوې خبرپاڼه کې د یادو وسایلو د نوعیت او همداراز د شمېر په تړاو څه نهدی ویلي، خو زیاته کړې یې ده: «دغه د منکراتو اسباب او وسایل د تېرو اتو میاشتو په موده کې د امربالمعروف محتسبینو په داسې حال کې نیولي وو، چې د خلکو لهخوا په منکراتو کې استعمالېدل».
همداراز شاوخوا ۳۰۰ کیلوګرامه ښځينه وېښتان چې پېر او پلور یې روان و، هم سوځول شوي دي.
خبرپاڼه کاږي، تر دې مخکې هم په دغه ولایت کې د طالبانو د محتسبینو له لوري د منکراتو ګڼ شمېر الات لهمنځه وړل شوي دي.
د یادونې وړ ده، چې په افغانستان کې طالبان دوه ځلي واک ته رسېدلي او د واکمنۍ په دواړو دورو کې یې د موسیقۍ تولید، خپرول او اورېدل منع کړي او هغه «حرام» بولي.
داعش خراسان د کابل په شهرنو کې پر یوه چینايي رسټورانټ د «ځانمرګي برید» مسوولیت منلی دی. دغه پېښه نن مازدیګر (دوشنبه د مرغومي ۲۹مه) رامنځته شوې او د طالبانو په وینا، په دې پېښه کې د یوه چینايي په ګډون ۷ کسان وژل شوي او ۱۳ نور ټپيان دي. په ټپيانو کې ښځې او ماشومان هم شامل دي.
داعش ډلې ته یوې نږدې رسنۍ په خپره شوې اعلامیه کې ویلي، چې د دوی یوه ځانمرګي بریدګر د کابل په شهرنو سیمه کې د چینایانو یوه رستورانټ ته له ننوتلو وروسته، د چینایي وګړو او امنیتي ساتونکو په منځ کې په ځان پورې تړلو چاودېدونکو توکو ته چاودنه ورکړې ده.
د داعش خراسان څانګې ادعا کړې، چې په دغه برید کې یو شمېر چینایان، ولسي وګړي او همداراز هغه طالب ځواکونه چې په یاده سیمه کې یې د امنیت ساتنې مسوولیت درلوده، وژل او ټپیان شوي دي. دغې ډلې د کوم سند له وړاندې کولو پرته د وژل او ټپیان شویو کسانو شمېر ۲۵ بللی دی.
دغې ډلې د چینايي وګړو د په نښه کولو لامل «له اویغور مسلمانانو سره د چین چلند» بللی دی. افغانستان انټرنشنل هم تر دې مخکې د خپلو سرچینو په حواله خبر ورکړی و، چې دغه پېښه د ځانمرګي برید له امله رامنځته شوې ده.
طالبان وايي د کابل په چاودنه کې د چینايي مسلمانانو رسټورانټ په نښه شوی | افغانستان انټرنشنل پښتو
طالبانو بیا ویلي، وژل شوی چینایی مسلمان و او ایوب نومېده او همداراز د سینګیانګ اوسېدونکی وو.
له یادې پېښې افغانستان انټرنشنل ته په رسېدلو ویډیوګانو کې لیدل کېږي، چې د دې چادونې له امله د چیني رسټورانټ ډېره برخه ویجاړه شوې ده.
د ورکړل شویو معلوماتو لهمخې، دغه رسټورانټ چې Chinese Noodle نومېږي د کابل د شهر نو په ګلفروشۍ کوڅه کې موقعیت لري او د چینايي مسلمانانو او افغانانو ګډ رسټورانټ وو.
دغه رسټورانټ د يوه چينايي مسلمان چې عبدالمجید نومېږي او د ده د مېرمنې او يوه افغان چې عبدالجبار محمود نومېږي له لوري په ګډه چلول کېده. عبدالمجید د چين د سینګيانګ ايالت اوسېدونکی مسلمان وو، دلته به د چينايي مسلمانانو لپاره خواړه تيارېدل او پلورل کېدل.
د خوست ولایت لپاره د طالبانو د رسنیو دفتر د دوشنبې په ورځ (د مرغومي ۲۹مه) د یوې خبرپاڼې په خپرولو سره خوست مېشتو ته خبرداری ورکړی، چې په دغه ولایت کې د بهرنۍ کرنسۍ استعمال او په ځانګړي ډول د پاکستانۍ کلدارو کارونه په مطلق ډول بند دی او له سرغړوونکو سره به جدي قانوني چلند وکړي.
په خبرپاڼه کې راغلي: «هېڅ شخص، دوکاندار او یا سوداګر ته اجازه نشته چې په خپلو معاملاتو او راکړه ورکړه کې له افغانیو پرته بله کرنسي وکاروي. د ملي اقتصاد د ساتنې، د افغانیو د ارزښت د خوندیتوب او د قانون د حاکمیت د ټینګښت په موخه اړوند ارګانونه مکلف دي چې د یادو مقرراتو د پلي کېدو جدي څارنه وکړي».
په خوست کې طالب مسوولینو همداراز له خوست مېشتو غوښتي، چې په خپلو ټولو مالي معاملاتو کې افغانۍ وکاروي او د نافذه قوانینو درناوی وکړي، څو د هېواد اقتصادي ثبات او ملي ګټو ته زیان و نه رسېږي.
د یادونې وړ ده، چې پخوا به په لوېدیځو ولایتونو کې ایراني تومان او په ختیځ، سوېل ختیځ او سوېلي ولایتونو کې په ورځنیو چارو او راکړو ورکړو کې تر ډېره پاکستانۍ کلدارې کارول کېدې، خو د جمهوري نظام په وروستیو کې په ډېریو ولایتونو کې پر بهرنیو اسعارو او په ځانګړې ډول پر پاکستانۍ کلدارو راکړه ورکړه بنده شوه او طالبانو هم د تېر نظام دغه پالیسۍ تعقیب کړه، خو د اقتصادي چارو شنونکي دا د اندېښنې وړ بولي چې لا هم په خوست ولایت کې کلدارې چلېږي.
د ملګرو ملتونو کارپوهانو له دولتونو غوښتي، چې په افغانستان کې جنسیتي اپارتاید (تبعیض) په رسمیت وپېژني او همداراز دا باید تضمین کړي، چې افغان ښځې د «بشریت پر ضد د جرمونو د مخنیوي او سزا ورکړې» د نوې معاهدې په راتلونکو مذاکراتو کې معنالرونکې او فعاله ونډه ولري.
په جینوا کې د ملګرو ملتونو د کارپوهانو ډلې د دوشنبې په ورځ (د مرغومي ۲۹مه) د یوې اعلامیې په خپرولو سره ویلي، دولتونه باید د «بشریت پر ضد د جرمونو د مخنیوي او سزا ورکړې» د نوې معاهدې د مسودې د جوړولو په برخه کې افغان ښځو ته چې دمګړی د طالبانو د ظلمونو ښکار دي، د معنا لرونکې زمینه برابره کړي.
دغو کارپوهانو له دولتونو غوښتي، چې له افغان ښځو، نجونو او هغو کسانو سره چې د خپل جنسیت له امله په نښه کېږي په ریښتیني توګه پیوستون وښيي او د افغانستان اوسني واقعیتونو درک کړي.
د ملګرو ملتونو دغو کارپوهانو ویلي: «موږ له غړو دولتونو غواړو چې د افغان ښځو، LGBT+ ټولنې او نورو فعالانو غوښتنې واوري او د نوې معاهدې په متن کې د جنسیتي اپارتاید جرم شامل کړي».
د دوی په وینا، په افغانستان کې د طالبانو له بیا واکمنېدو سره سم، دغې ډلې له ټولنې د افغان ښځو او نجونو د حذف لپاره یو سیستماتیک او بنسټیز کمپاین پیل کړی، چې پهکې ګڼ محدودوونکي فرمانونه هم شامل دي.
طالبانو له نږدې پنځو کلونو راهیسې نجونې زدهکوونکې له شپږم ټولګي پورته له زدهکړو منع کړي، د ښځو د کار حق یې سخت محدود کړی او عملاً یې د ښځو عامه حضور جرم ګرځولی دی.
کارپوهانو زیاته کړې: «دولتونه باید د جنسیتي اپارتاید د جرم په توګه د قانوني ثبت ملاتړ وکړي او د معاهدې په ټولو برخو کې د جنسیت پر بنسټ حساس مواد شامل کړي. موږ له دولتونو غواړو چې د افغان ښځو، نجونو او د جنسیتي تنوع لرونکو کسانو ملاتړ نور هم پیاوړی کړي».
دوی همداراز له دولتونو غوښتي، چې د طالبانو د «رژیم» د عادي کېدو مخنیوی وکړي، د کډوالۍ لپاره خوندي، قانوني او اوږدمهاله لارې برابرې کړي، د ښځو په مشرۍ مدني ټولنو ته دوامداره مالي ملاتړ برابر کړي او همداراز د جنسیتي اپارتاید نومول، د دغې ښکارندې د له منځه وړلو لپاره یو ضروري ګام بللی دی.
د ملګرو ملتونو کارپوهانو زیاته کړې: «موږ باید له هغو کسانو سره ودرېږو چې د مبارزې په لومړۍ کرښه کې دي، هغوی ته د خپل ژوند د واقعیت لپاره قانوني نوم ورکړو او نړۍوالې ټولنې ته زمینه برابره کړو چې د ټولو جرمونو لپاره مجرمین حساب ورکړې ته اړ کړي».
له دې سره سم، د تېر نظام د ولسي جرګې پخوانۍ غړې فوزیه کوفي د ملګرو ملتونو د کارپوهانو له دغې اعلامیې هرکلی کړی او د ملګرو ملتونو له شپږمې کمېټې یې غوښتي، چې د «بشریت پر ضد د جرمونو د مخنیوي او سزا ورکړې» په مذاکراتي بهیر کې افغان ښځو ته د ګډون زمینه برابره کړي.
په داسې حال کې چې د افغانستان په ګڼو ولایتونو کې خلک د خوراکي توکو د کمښت او د بیو له لوړېدو شکایت لري، طالبانو د فراه په ګمرک کې له خوراکي توکو بار سلګونه بار وړونکي موټر درولي او بازارونو ته یې د تلو اجازه نه ورکوي.
یو شمېر سوداګرو او موټر چلوونکو له افغانستان انټرنشنل-پښتو سره په خبرو کې ویلي، چې ټول قانوني او ګمرکي اداري چارې یې بشپړې کړي، خو بیا هم د بېلابېلو پلمو له امله بازارونو ته د تګ اجازه نهورکول کېږي.
سوداګر وایي، د طالبانو تر ادارې لاندې د فراه ګمرک او د عامې روغتیا ریاست ترمنځ نههمغږي او نوي محدودیتونه د دې لامل شوي، چې سوداګریز توکي یې په ګمرکونو کې وځنډېږي.
دا ستونزه نهیوازې سوداګرو ته مالي زیان اړوي، بلکې د خلکو پر ورځیني ژوند هم ناوړه اغېز کوي.
یو سوداګر چې له څو ورځو راهیسې یې مالونه په فراه ګمرک کې بند پاتې دي افغانستان انټرنشنل- پښتو ته وایي، چې ټول رسمي اسناد یې چمتو کړي، خو بیا هم د فراه ولایت لپاره د طالبانو د عامې روغتیا ریاست له لوري نوې غوښتنې مطرح کېږي.
هغه وویل: «موږ ټول ګمرکي مراحل خلاص کړي دي، مالیه مو ورکړې، اسناد مو مکمل دي، خو بیا هم اجازه نهراکوي. هره ورځ نوې بهانې کوي او وایي چې نور اسناد راوړئ».
د سوداګرو په وینا، د فراه لپاره د طالبانو د عامې روغتیا ریاست پر هر بیچ نمبر جلا اسناد او جلا نمونې غواړي، په داسې حال کې چې په یوه موټر کې درې بېلابېل بیچ نمبرونه وي.
یو بل سوداګر د نوم د نهخپرېدو په شرط د یادې ستونزې په اړه وایي: «په هر موټر کې موږ درې بیچ نمبرونه لرو، خو روغتیا ریاست وایي چې د هر بیچ نمبر لپاره جلا اسناد او جلا نمونه غواړو، دا کار نهعملي دی او نههم پخوا داسې پروسه وه».
هغه زیاتوي، چې د وارداتي توکو د کیفیت د ارزونې لپاره دوی تل نمونې وړاندې کړي، خو اوس له هر موټر څخه درې نمونې غوښتل کېږي، چې دا کار هم د وخت ضایع کېدو او هم د مالونو د خرابېدو سبب ګرځي.
موټر چلوونکي چې په سړه هوا او سختو شرایطو کې د فراه په ګمرک کې بند پاتې دي وایي، چې نهیوازې اقتصادي زیان ویني، بلکې له انساني ستونزو سره هم مخ دي.
یو موټر چلوونکی چې په خپل موټر کې یې غوړي بار کړي، وايي: «څو ورځې کېږي دلته ولاړ یو نه اجازه شته چې لاړ شو او نه څوک زموږ حال پوښتي، مالونه مو د خرابېدو په حال کې دي که خراب شي تاوان یې څوک راکوي».
د سوداګرو د معلوماتو او ترلاسه شویو ویډیوګانو لهمخې، په دغو بند پاتې موټرو کې غوړي، بوره، وریجې او نور لومړني خوراکي توکي بار دي.
سوداګر خبرداری ورکوي، چې د ډېر ځنډ له امله به دغه خوراکي توکي خراب شي او په پایله کې به یې سوداګر تاواني او ورسره به بازارونه د خوراکي توکو له کمښت او د بیو له لوړېدو سره مخ شي.
عام خلک هم د خوراکي توکو د بیو له لوړېدو شکایت لري او وایي، چې چارواکي د خلکو اړتیاوو ته پاملرنه نهکوي.
د فراه یو اوسېدونکی میرزا خان وایي: «په بازار کې بوره، غوړي، وریجې او نور خوراکي توکې ورځ تر بلې ګرانېږي، موږ اورو چې مالونه په ګمرک کې بند دي، خو چارواکي یې نهخوشې کوي، که دا مالونه بازار ته راشي بیې به یې هم راټیټې شي».
خلک زیاتوي، چې له یوې خوا له پاکستان سره سوداګریزې لارې تړلې دي او له بلې خوا هغه مالونه چې له نورو لارو افغانستان ته راځي په ګمرکونو کې ځنډېږي چې په وینا يې، دا وضعیت د خوراکي توکو د کمښت او د بیو د بېسارې لوړېدو اصلي لامل دی.
سوداګر، موټر چلوونکي او عام خلک په ګډه له طالب چارواکو غواړي، چې د خوراکي توکو د وارداتو لپاره اسانتیاوې رامنځته کړي، غیر ضروري خنډونه لرې کړي او پر دې توکو کمه مالیه ولګوي، څو نه سوداګر زیانمن شي او نه خلک له لوږې او ګرانو بیو سره مخ شي.
دوی ټینګار کوي، که د فراه په ګمرک کې دا ستونزه ژر حل نهشي، نو اغېزې به یې یوازې پر فراه نه، بلکې پر ټول هېواد څرګندې شي.
طالبانو او په ځانګړې توګه د فراه ولایت د ګمرک مسوولینو لا تر اوسه په دې تړاو څه نهدي ویلي.
د طالبانو د اقتصاد وزارت مرستیال عبدالطیف نظري ویلي، افغانستان له یو ځانګړي جیوپولېټیک جیواېکانومېک موقعیت څخه برخمن دی، چې سوېلي اسیا او منځنۍ اسیا سره نښلوي. هغه وایي، ځینې هېوادونه هڅه کوي چې د افغانستان جیوپولېټیک موقعیت لهمنځه یوسي.
نوموړي دا څرګندونې دوشنبه د (مرغومې ۲۹مه) په کابل د یوه خصوصي پوهنتون له لوري د کارموندنې په نوم یو کنفرانس ته کړې دي. هغه زیاته کړې، چې افغانستان د ځانګړي ټرانزیټي موقعیت څخه برخمن دی او له همدې کبله د کاري فرصتونو په ډېرېدو کې ځانګړی رول لري. نظري وایي: «افغانستان د مرکزي اسیا او سوېلي اسیا د وصل نقطه ده، افغانستان د اوراسیا اقتصادي کواریډور دی».
د طالبانو دغه هزاره توکمی چارواکی په دې باور دی، چې د افغانستان جغرافیه په سیاسي لحاظ باندې پر سیمه ژور اغېز لري او هممهاله د لویو قدرتونو ګاونډی هم دی. نوموړی ادعا کوي، چې یو شمېر هېوادونه هڅه کوي، چې د افغانستان جیوپولټېک حیثیت لهمنځه یوسي؛ خو هغه د خپلې وینا پر مهال دا هم ویلي چې نه غواړي د دغو هېوادونو نومونه واخلي.
د هغه په وینا، د افغانستان جیواېکانومېک او ټرانزیټي ارزښت په هېواد کې د کاري فرصتونو د رامنځته کولو او زیاتوالي لپاره خورا ګټور دی. نوموړی داسې مهال دا څرګندونې کوي، چې په تېرو څه باندې څلورو کلونو کې د طالبانو د واکمنۍ له کبله په هېواد کې بېروزګاري ډېره شوې او نړۍوالو ادارو افغانانو کې د لوږې زیاتوالي په تړاو هم ژورې اندېښنې ښوولې دي.
راپورونه وایي، افغانستان کې سلګونه زره کسانو په تېرو نږدې پنځو کلونو کې دندې له لاسه ورکړي، چې ډېری برخه یې د مخکېني جمهوري نظام امنیتي کارکوونکي او دولتي مامورین وو. همداراز په کابل او ولایتونو کې د نړۍوالو مرستندویه ادارو د بندېدو له کبله هم لسګونه زره کسانو دندې له لاسه ورکړي او هېواد د روزګار په برخه کې له سختې بېثباتۍ سره مخ دی.
نیوکې دا دي، چې طالبان په حکومتي ساختارونو کې یوازې د خپلو کسانو پر ګومارلو اخته دي او ان پخواني مامورین چې د دوی له سلیقې او افکارو سره برابر نه دي، هم یې له دندو ګوښه کړي دي.