د پوتین استازی: اروپا نهشي کولای له امریکا سره د ګرینلنډ د یو ځای کېدو مخه ونیسي
د پانګونې او اقتصادي همکارۍ په چارو کې د روسیې د ولسمشر ځانګړی استازی کریل دیمتریف وايي، چې امریکا به ګرینلنډ ترلاسه کړي. د پوتین استازی په دې باور دی، چې «اروپا به فشار ته تسلیم شي او ګرینلنډ به د امریکا تر کنټرول لاندې راشي».
کریل دیمیترییف د ولادیمیر پوتین له نږدې کسانو څخه دی او د امریکا له استازو سره یې د روسیې او اوکراین د سولې په څو خبرو اترو کې د هغه استازیتوب کړی دی. دیمیترییف له ۲۰۲۲کال راهیسې د امریکا د بندیزونو په نوملړ کې شامل دی.
سره له دې هغه د ۲۰۲۵کال د اکتوبر په میاشت کې میامي ته ولاړ او د ټرمپ له ځانګړي استازي ستیو وېټکاف او د امریکا د ولسمشر زوم جرد کوشنر سره یې خبرې وکړې. امریکایي چارواکو هغه مهال ویلي و، د ټرمپ حکومت د ځانګړي معافیت په ورکولو سره هغه ته اجازه ورکړې چې امریکا ته سفر وکړي.
د ګرینلنډ په اړه د پوتین د استازي څرګندونې داسې مهال دي، چې اروپایي مشرانو د یادې مسلې سره خپل مخالفت څرګند کړی. ډونالډ ټرمپ ټینګار کړی، چې امریکا د خپل ملي امنیت لپاره ګرینلنډ ته اړتیا لري او باید هغه ترلاسه کړي.
