د طالبانو تر واک لاندې اريانا افغان هوايي شرکت وایي چې د دغه شرکت پیرل شوې يوه ځانګړې چارټر کارګو الوتکه نن د دوشنبې په ورځ کابل نړيوال هوايي ډګر ته رسېدلې ده. ياده بوېنګ ۷۳۷–۳۰۰ الوتکه په يو سفر کې د شاوخوا ۱۶،۵ ټنه بار د لېږد وړتيا لري.
د دغه شرکت د معلوماتو له مخې، ياده کارګو الوتکه د بوېنګ ۷۳۷–۳۰۰ډول ده او د سوداګريزو اموالو د لېږد په موخه به د کابل–ډهلي په سکټور کې فعاليت کوي. دغه الوتکه په يو سفر کې د شاوخوا ۱۶.۵ ټنه بار د لېږد وړتيا لري.
د خبر له مخې، د دې کارګو الوتکې لپاره د متحده عربي اماراتو له سرپلیکس قراردادي شرکت سره د شپږو مياشتو لپاره رسمي تړون لاسليک شوی دی.
د اريانا افغان هوايي شرکت مشر ملا بختالرحمن شرافت وايي چې دا ګام د ملي سوداګرو سره د اريانا د شويو ژمنو د عملي کېدو يوه مهمه برخه ده.
نوموړي زياته کړې چې د کارګو شبکې پراختيا، د ملي اقتصاد پياوړتيا، د هوا له لارې د صادراتو زياتوالی او د افغانستان د هوايي ټرانسپورټ د ظرفيت لوړول د دغه شرکت له اساسي موخو څخه دي.
د اريانا افغان په وينا، ياده کارګو الوتکه به د افغانستان او هند ترمنځ د سوداګرۍ په پراختيا، د هوايي انتقالاتو په زياتوالي، د صادراتو په چټکتيا او د ملي سوداګرو د ترانسپورټي ستونزو په کمولو کې مهم رول ولوبوي.
د شرکت په وینا، د دې کارګو الوتکې له لارې به ملي سوداګرو ته دا اسانتيا برابره شي چې خپل سوداګريز توکي پر وخت، په ارزانه، خوندي، منظم او چټک ډول نړيوالو بازارونو ته ولېږدوي.
