د افغانستان د بشري حقونو خپلواک کمېسیون پخوانۍ مشره شهرزاد اکبر وايي، طالبان په خپلسرو نیونو، شکنجو او ځورولو خپل جرمونه نهشي پټولی. هغې زیاته کړې، چې طالبان به د دغه کړنو حساب ورکوي.
شهرزاد اکبر پر اېکس پاڼه د بشري حقونو د نړۍوالې ورځې او د قربانیانو د ملي ورځې په مناسبت د رواداري په نوم د بشري حقونو د بنسټ یو سند هم شریک کړی. په دغه سند کې «د بشري حقونو د سرغړونو او د قربانیانو لپاره عدالت ته د لاسرسي» تر سرلیک لاندې مهمې غوښتنې او سپارښتتنې وړاندې شوې دي.
اغلې اکبر زیاته کړې، چې دغه سند له نړۍوالو محکمو تر نورو انتخابونو پورې «د عدالت» اسانه لارې تشریح کوي. په ورته وخت کې د ملګرو ملتونو کارپوهانو له دولتونو غوښتي، په افغانستان کې جنسیتي اپارتاید (تبعیض) په رسمیت وپېژني او همداراز دا باید تضمین کړي چې افغان مېرمنې د «بشریت پر ضد د جرمونو د مخنیوي او سزا د ورکړې» د نوې معاهدې په راتلونکو مذاکراتو کې معنالرونکې او فعاله ونډه ولري.
