طالبانو په ننګرهار او بلخ ولایتونو کې د دوو ښځو په ګډون ۱۹ کسان د نامشروع اړيکو، له کوره د تېښتې، نشهيي توکو او الکولي مشروباتو د استعمال، پېر او پلور په تور په عام محضر کې په دُرو وهلي دي.
د طالبانو سترې محکمې د سېشنبې په ورځ (د مرغومي ۳۰مه) د دوو جلا - جلا خبرپاڼو په خپرولو سره ویلي، چې یاد کسان له ۱۰ څخه تر ۳۹ دُرو تعزیري سزا محکوم شوي وو او دغه پرېکړه د یادې ډلې د سترې محکمې له تایید وروسته پر تورنو کسانو تطبیق شوې ده.دا په داسې حال کې ده، چې طالبانو په تېره یوه اوونۍ کې څه باندې ۴۰ کسان په عام په محضر کې په دُرو وهلي دي.پر افغانستان د طالبانو له بیا واکمنېدو وروسته یادې ډلې په عام محضر کې د بدني سزاوو او اعدامونو تطبیق بیا پیل کړی دی. دغه اقدامات د نړۍوالې ټولنې او د بشري حقونو د بنسټونو له پراخو غبرګونونو سره مخ هم دي.نړۍوالو بنسټونو او د بشري حقونو مدافعینو په وار- وار له طالبانو غوښتي، چې د تورنو کسانو پر وړاندې د بدني سزاوو تطبیق ودروي، خو طالبان وایي چې دا مجازات د دوی له لوري د «اسلامي شریعت» پر بنسټ عملي کېږي او پر خپله تګلاره ټینګار کوي.
