په کابل کې د روسیې سوداګریز مرکز وايي، چې طالبان د روسیې د تاتارستان د ولسمشر رستم منینخانوف په نامه د یو سړک د نومولو په اړه غور کوي. رستم حبیب الله وايي، چې وړاندیز د طالب چارواکو له لوري مطرح شوی او دا موضوع لږ تر لږه له دوو کلونو راهیسې تر بحث لاندې ده.
په افغانستان کې د روسیې د سوداګریز مرکز مشر رستم حبب الله ویلي چې دا ډول سړک نه یوازې د ښاري ادرس له اړخه مهم دی، بلکې د بهرنیو اړیکو یو پیغام هم دی.
هغه د جنورۍ له۱۲ مې نېټې د نوم بدلولو لپاره د رایو یوه پروسه پیل کړې، چې دده په وینا، تر اوسه شاوخوا ۳۰۰۰ رایې ورکړل شوې دي. د نوموړي په وینا، په زړه پورې خبره دا ده چې د مخالفینو شمېر له ملاتړ کوونکو زیات دی.
نوموړي دا نه دي ویلي، چې دوی دا پروسه له طالبانو سره په همغږۍ پیل کړې او که په خپل سر دا چاره کوي.
نوموړي د روسیې بیزنس انلاین ته ویلي، چې ددې پروسې په راتلونکي پړاو کې پلان شوې چې غوښتنه کابل ښاروالۍ ته وړاندې شي.
حبیب الله ویلي چې دا نظر د افغانستان د نویو چارواکو له سخت ملاتړ سره مخ دی، ځکه دوی غواړي د تاتارستان د مشر هڅې وستایي او د هغه شخصي لاسته راوړنې ونمانځي.
نوموړي په خپله مرکه کې ویلي چې د کابل نوی حکومت د تاتارستان د رییس رستم منیخانوف درناوی کوي، ځکه دوی ورسره په منظم ډول په تماس کې دي او د مختلفو سازمانونو او کنفرانسونو لپاره دغه جمهوریت ته سفر کوي.
نوموړی وايي، د طالب چارواکو موخه دا ده چې د منیخانوف نوم د تل لپاره پاتې شي، څو نور د سیمې مشران هم هغه وګوري او له هغه پیروي وکړي.
هغه یادونه کړې چې وړاندیز د طالب چارواکو له لوري مطرح شوی او دا موضوع لږ تر لږه دوه کاله تر بحث لاندې ده.
حبیب الله څرګنده کړې چې د طالبانو ادارې د منینخانوف د درناوي له امله دا وړاندیز کړی، ځکه هغه د روسیې له لوري له اسلامي هېوادونو سره د اړیکو په پراختیا کې فعاله ونډه لري.
په افغانستان کې د روسيې سوداګریز مرکز د ۲۰۲۳ کال د جولای میاشتې پر۱۶مه پرانیستل شوی. یاد مرکز د سوداګرۍ او اقتصادي اړیکو پراختیا ته ځانګړی شوی، خو د بشري مرستو فعالیتونه هم کوي.
