نایجریا کې وسلهوالو له یوې کلیسا لسګونه عبادت کوونکي تښتولي دي
د نایجریا د کادونا ایالت د یوې کلیسا مشر وایي، چې وسلهوالو له دوو کلیساوو څخه لسګونه عبادت کوونکي تښتولي دي. د یادې کلیسا مشر د تښتول شویو کسانو شمېر تر ۱۶۰ ډېر یاد کړی دی.
د کادونا ایات پولیسو ویلي، چې وسلهوال په پرمختللو وسلو سمبال وو. پولیسو د تښتول شویو کسانو کره شمېر نهدی یاد کړی. د پولیسو ویاند ویلي، چې د سړکونو د خرابوالي او د سیمې د لرې والي له امله کره معلوماتو ترلاسه کول ستونزمن دي.
د نایجریا د شمالي برخې د یوې عیسوي ټولنې مشر ریورنډ جان حیاب د ټلیفون له لارې رویټرز ته ویلي، ۱۷۲ عبادت کوونکي تښتول شوي چې ۹ تنه له برید کوونکو بېرته تښتېدلي دي. پولیسو ویلي، چې د تښتوونکو د څار او د نیول شویو کسانو د ژغورولو لپاره یې سیمې ته یوشمېر ځواکونه لېږلي دي.
