د افغانستان د ملي امنیت پخوانی رییس رحمت الله نبیل وایي، له امریکا او سیمې څخه د رسنیو د خبرونو او د امریکايي سیاستوالو د دریځونو له مخې داسې ښکاري چې د امریکا متحده ایالاتو له خوا د ایران پر ضد د پوځي اقدام احتمال ډېر جدي دی.
نبیل د سې شنبې په ورځ پر اېکسپاڼه ویلي چې د دې اقدام په عملي کېدو کې ځنډ د شا تګ معنا نه لري، بلکې کېدای شي د لا پراخ چمتووالي نښه وي، څو یو لا دروند او سخت برید ترسره شي.
نبیل زیاتوي چې دا فشارونه ښايي د دې لپاره وي چې د ایران مشران اړ کړي، څو د سیمې، اسراییل او په سیمه کې د امریکا د ګټو په اړه په خپله سیاسي او امنیتي ستراتیژۍ کې بنسټیز بدلون راولي.
نبیل د ګرینلډ په اړه هم څرګندونې کړې دي.
هغه ویلي: «د ګرینلنډ پر موضوع د اروپا او امریکا ترمنځ نرم او کنټرول شوی اختلاف کېدای شي یا په دې پړاو کې د عامه افکارو د غولولو رول ولوبوي او یا هم د دې لپاره وکارول شي چې اروپا د امریکا د دې پوځي اقدام په اړه همغږې او متحدې کړي.»
هغه وایي، ایران ته د امریکا پیغام رواښانه دی «یا دې خپل محاسبات او چلند بدل کړي او یا به په نږدې راتلونکي کې د لا سترو لګښتونو بیه پرې کړي.»
دا په داسې حال کې ده چې د ایران دننه د لاریون کوونکو پر وړاندې د حکومت تاوتریخوالي له امله د امریکا ولسمشر ډونالډ ټرمپ د ایران حکومت ته ګواښونه کړي چې د تاوتریخوالي د نه درولو په صورت کې به اقدام وکړي. اوس د ګڼو ایرانیانو په شمول زیات شمېرخلک د امریکا برید ته په تمه دي.
تر دې وړاندې سپینې ماڼۍ ویاندې کارولین لوېوت ویلي و چې له ټرمپ پرته بل هېڅوک نهپوهیږي، چې د ایران په اړه به څه پرېکړه کیږي. هغې زیاته کړې: «ولسمشر ډېر انتخابونه لري او د تل په څېر به هغه پرېکړې وکړي چې د امریکا او نړۍ په ګټه وي».
