ټېکټاک د پاکستاني کاروونکو تر ۲۸مېلیونه ډېرې ویډیوګانې لرې کړې
ټېکټاک وايي، د ۲۰۲۵کال له جولای څخه تر سېپتمبر میاشتې پورې یې د یادې شبکې د ټولنیزو لارښوونو د سرغړونې له امله د پاکستاني کاروونکو تر ۲۸مېلیونه ډېرې ویډیوګانې ړنګې کړې دي. د راپورونو له مخې؛ ۹۵٫۹سلنه دغه ویډیوګانې تر پورته کېدو وروسته له ۲۴ساعتونو څخه په کمه موده کې لرې شوې دي.
دغه شمېره د جولای څخه تر سپتمبر میاشتې پورې د ټېکټاک د ټولنیزو لارښوونو د پلي کولو راپور کې ثبت شوې ده. ټیکټاک ویلي، دغه راپور د یادې شبکې ژمنتیا ښيي چې کاروونکو ته خوندي ډیجیټلي چاپېریال برابر کړي او همدارنګه هغه د مخنیوي وړ تدابیر تشریح کړي چې د سرغړونکې منځپانګې د پېژندلو او ړنګولو لپاره کارول کېږي.
په نړۍواله کچه ټېکټاک په همدې موده کې ټولټال ۲۰۴مېلیونه، ۵۳۴زره او ۹۳۲ ویډیوګانې ړنګې کړې دي، چې د دغه شبکې د ټولو پورته شویو منځپانګو شاوخوا ۰٫۷ سلنه جوړوي. له دې ډلې ۱۸۶ مېلیونه، ۶۰۸زره او ۸۱ ویډیوګانې د اتومات پېژندنې ټېکنالوژۍ له لارې ړنګې شوې دي.
