عربستان، ترکیې، مصر، اردن، اندونیزیا، پاکستان او قطر د ټرمپ «سولې بورډ» بلنه ومنله
د سعودي عربستان د بهرنیو چارو وزارت په یوه ګډه اعلامیه کې وویل چې عربستان، ترکیې، مصر، اردن، اندونیزیا، پاکستان او قطر د امریکا د ولسمشر ډونالډ ټرمپ د «د سولې بورډ» بلنه منلې ده. په دې اعلامیه کې د متحده عرب اماراتو نوم هم شامل دی.
اعلامیې زیاته کړې چې هر هېواد به د خپلو قانوني اصولو مطابق د ګډون اسناد لاسلیک کړي.
ټرمپ د نړۍ ګڼو مشرانو ته د دې نوښت بلنه ورکړې، چې موخه یې د نړیوالو شخړو حل کول دي، خو ډیپلوماتان وایي، دا ګام د ملګرو ملتونو پر رول منفي اغېز لرلی شي.
