ټرمپ: د ګرينلنډ د نیولو لپاره ځواک نه کاروم خو یوازې امریکا یې ساتلی شي
د امریکا ولسمشر ډونالډ ټرمپ د چارشنبې په ورځ په سویس کې د داوس نړیوال اقتصادي فورم په غونډه کې وویل چې د ګرينلنډ د ترلاسه کولو لپاره ځواک نه کاروي، خو زیاته یې کړه، چې هېڅ بل هېواد د ډنمارک دا سیمه نه شي خوندي کولی.
ټرمپ وویل: «خلکو فکر کاوه چې زه به ځواک وکاروم، خو زه ځواک کارولو ته اړتیا نه لرم. زه نه غواړم ځواک وکاروم».
هغه دغه څرګندونې په داسې وخت کې وکړې چې د هغه د ګرينلنډ د پېرلو هڅې له اروپا سره د اړیکو په ترینګلتیا تمامې شوې دي.
ټرمپ دا موضوع «یوه وړه غوښتنه» او د «یخ ټوټه» وبلله او ویې ویل چې د ګرينلنډ ترلاسه کول به د ډنمارک او امریکا په ګډون ناټو ته ګواښ نه وي.
هغه زیاته کړه: «زه غواړم سملاسي خبرې اترې وکړم چې د امریکا له خوا د ګرينلنډ د اخیستلو موضوع بیا وڅیړل شي».
د ناټو مشرانو خبرداری ورکړی چې د ټرمپ د ګرينلنډ ستراتیژي کولی شي د اتحادیې توازن ګډوډ کړي، په داسې حال کې چې د ډنمارک او ګرينلنډ مشرانو د امریکا د زیات حضور لپاره بېلابېلې لارې وړاندیز کړې دي.
ټرمپ په غونډه کې وویل: «موږ د نړیوال خونديتوب لپاره یوه یخه ټوټه غواړو، خو هغوی یې نه راکوي».
