د ۱۹ کلنو نړۍوال جام؛ افغانستان سبا له تانزانیا سره مخامخ کېږي
د ۲۰۲۶ کال د نولس کلنو د پنځوس اوریز کرېکټ نړۍوال جام د ګروپي پړاو د سیالیو پر دوام، د افغانستان د کرېکټ ملي لوبډله سبا له تانزانیا سره مخامخ کېږي. دا لوبه د کابل پر وخت د غرمې په ۱۲:۰۰ بجو په نامیبیا کې ترسره کېږي.
افغانستان د دوو پرلهپسې بریاوو او د څلورو امتیازونو په لرلو سره د دغو سیالیو د څلورمې ډلې په سر کې ځای لري.
د افغانستان د ۱۹ کلنو ځوانانو لوبډلې د ګروپي پړاو په لومړنیو دوو لوبو کې په زړه پورې لوبه کړې او د ټولو پام یې ځان ته اړولی دی. دې لوبډلې په لومړۍ لوبه کې سوېلي افریقا ته د ۲۸ منډو په توپیر ماتې ورکړه او په دویمه لوبه کې یې ویسټانډیز ته په ډېر لوی توپیر، یعنې د ۱۳۸ منډو په ماتولو سره له لارې لرې کړ.
بل پلو، د تانزانیا لوبډلې د سوېلي افریقا او ویسټانډیز پر وړاندې خپلې دواړه لوبې بایللې دي او پرته له کوم امتیاز څخه د جدول په وروستي ځای کې ده.
دا په داسې حال کې ده، چې افغانستان د دغې ډلې یوازینۍ لوبډله ده چې خپلې دواړه لوبې یې ګټلې دي او د څلورو امتیازونو په لرلو سره د جدول په سر کې ځای لري. سوېلي افریقا او ویسټانډیز هره یوه د دوو امتیازونو په لرلو سره په دویم او درېیمو ځایونو کې دي او تانزانیا پرته له کوم امتیاز څخه په څلورم مقام کې ولاړه ده.
تانزانیا له سختو ماتو سره مخ شوې ده او د ویسټانډیز پر وړاندې د ۱۷۴ منډو او د سوېلي افریقا پر وړاندې د ۳۲۹ منډو په توپیر ماتې خوړلې ده. له همدې امله، افغانستان یوه اسانه لوبه په مخ کې لري او د دې سیالۍ د ګټلو اصلي چانس له ځان سره لري.
د دې په پام کې نیولو سره چې سوېلي افریقا او ویسټانډیز د ګروپي پړاو په وروستۍ لوبه کې یو د بل پر وړاندې درېږي، بل پړاو ته د افغانستان د ۱۹ کلنو کرېکټ ملي لوبډلې وتل له همدا اوسه قطعي شوې ده؛ د هغې لوبې پایله چې هر څه وي، افغانستان بل پړاو ته د تلو جواز ترلاسه کړی دی.
