پاکستان د هندي الوتکو لپاره د هوايي حریم بندیز د فبرورۍ تر ۲۴مې پورې وغځاوه
د پاکستان د هوايي ډګرونو ادارې (PAA) د چهارشنبې په ورځ (د سلواغې لومړۍ نېټه) خبر ورکړی، پر هندي الوتکو د هوايي حریم بندیز به د فبرورۍ تر ۲۴مې نېټې پورې وغځول شي. تر دې وړاندې یادې ادارې د جنورۍ تر ۲۳مې پورې پر هندي الوتکو د هوايي حریم بندیز اعلان کړی و.
د پاکستان هوایي ډګرونو ادارې زیاته کړې، چې دغه بندیز یوازې د هند سوداګریزو الوتکو پورې محدود نهدی؛ بلکې د هند په ملکیت کې اخیستل شوې ټولې پوځي او ملکي الوتکې هم په دغه بندیز کې شاملې دي. یاده دې وي، چې د هندي الوتکو لپاره د پاکستان فضایي حریم د اپرېل له ۲۳مې نېټې راهیسې تړلی دی.
پاکستان او هند د تېر ۲۰۲۵کال له اپرېل میاشتې راهیسې د کشمیر په پهلګام سیمه کې تر خونړي برید وروسته چې ۲۶ کسان پهکې ووژل شول، د یو بل پر وړاندې خپل هوايي حریمونه تړلي دي.
