د افغانستان د کرېکټ ملي لوبډلې چټک توپاچوونکی نوینالحق له انګلیسي کلپ یورکشایر سره تړون لاسلیک کړ. دا ۲۶ کلن توپاچوونکی لومړنی افغان لوبغاړی شو، چې په تاریخي ډول د دغه مشهور کلپ په ګټه د ۲۰۲۶ کال په بلاسټ شل اوریزو سیالیو کې لوبېږي.
دا خبر په داسې حال کې خپرېږي، چې څو ورځې وړاندې د افغانستان کرېکټ بورډ اعلان وکړ، چې د کرېکټ ملي لوبډلې ستوری نوینالحق د ښي اوږې د ټپ له امله د ملي لوبډلې له جوړښت څخه اېستل شوی او پر ځای یې ضیاءالرحمان شریفي په لوبډله کې شامل شوی دی. ویل شوي وو، چې نوموړی به د خپلې درملنې د دوام په موخه انګلستان ته سفر وکړي.
خو اوس د یورکشایر کلپ په خپله رسمي اعلامیه کې لیکلي، چې نوینالحق په وروستیو کلونو کې د نړۍ یو له تر ټولو غوره شل اوریزو توپاچوونکو څخه دی او په توپاچونه کې د بېلابېلو مهارتونو او د ویکټو اخیستو د لوړې وړتیا له امله له دغه کلپ سره یوځای شوی دی.
د یورکشایر کلپ د راپور لهمخې، دغه لوبغاړي تر اوسه په ۲۲۳ شل اوریزو لوبو کې ۲۷۱ ویکټې ترلاسه کړې دي او د هغه تر ټولو غوره کارکردګي د ۱۱ منډو په ورکولو سره د ۵ ویکټو اخیستل ثبت شوي دي.
دا په داسې حال کې ده، چې دغه افغان لوبغاړي تر دې وړاندې هم د «بلاسټ» په سیالیو کې بریالۍ تجربه درلوده. نوینالحق په ۲۰۲۱ کال کې د لسټرشایر په کمیس کې د ۲۶ ویکټو په اخیستو سره د دغو سیالیو د غوره توپاچوونکي لقب وګاټه او یو کال وروسته هم په دغه جدول کې په دویم مقام کې راغی.
نوینالحق د دغه تړون په تړاو کې ویلي، چې په یورکشایر کې شتون ورته یو لوی ویاړ دی. هغه زیاته کړې: «یورکشایر له ویاړونو ډک تاریخ لرونکی کلپ دی او د هیډینګلي لوبغالی په ټوله نړۍ کې پېژندل شوی دی. زه ډېر لېوال یم چې د دغې لوبډلې د مینوالو پر وړاندې لوبه وکړم او د ۲۰۲۶ کال د بلاسټ په سیالیو کې د یورکشایر په بریاوو کې برخه ولرم».
د یاد کلپ د مسوولانو په وینا، نوینالحق به د سیالیو له رسمي پیل وړاندې د لوبډلې له تمریناتي کمپ سره یوځای شي او په خپلې نړۍوالې تجربې او تخنیکي وړتیاوو سره به د یورکشایر جوړښت نور هم پیاوړی کړي.
د یورکشایر کرېکټ عمومي مدیر ګاوین همیلټن هم د دغه لېږد په هرکلي سره ویلي، چې نوینالحق په بلاسټ سیالیو کې د ځلانده کارنامې لرونکی لوبغاړی دی او په توپاچونه کې د هغه بېلابېل مهارتونه د دغې لوبډلې لپاره یوه اغېزناکه وسله کېدای شي. هغه زیاته کړې، چې د دغه افغان توپاچوونکي جذبول د راتلونکي لپاره د یورکشایر جدیت او لوړ ارمانونه ښیي.
نوینالحق چې د هند غوره لیګ (IPL)، د پاکستان سوپر لیګ (PSL) او د ۲۰ اوریزو حرفوي لیګونو د ګډون تجربه په خپله کارنامه کې لري، په ۲۰۲۱ کال کې یې د انګلستان له لسټرشایر کرېکټ لوبډلې سره تړون لاسلیک کړ او د فاکسز لوبډلې سره د خپل درې کلن حضور پر مهال خورا ځلانده څرګند شو.
