پاکستان د ټرمپ «د سولې نړیوال بورډ» غړیتوب ومانه
د پاکستان لومړي وزیر شهباز شریف د متحده ایالاتو ولسمشر ډونالډ ټرمپ بلنه منلې چې د «سولې نړیوال بورډ» برخه شي. د پاکستان د بهرنیو چارو وزارت په یوه اعلامیه کې ویلي چې هېواد یې غواړي «فلسطینیان د نړیوالو تګلارو او ملګرو ملتونو د پرېکړو په رڼا کې د خپلواکۍ حق ترلاسه کړي».
ټرمپ پلان لري چې یاد بورډ د غزې شخړې څخه پیل او وروسته نورې نړیوالې شخړې هم حل کړي.
تر اوسه یوازې څو هېوادونو لکه هنګري، اسراییل، ترکیې، کوسوو او متحده عربي اماراتو په دې بورډ کې غړیتوب منلی دی.
د رویټرز د راپور له مخې، د بورډ د غړیتوب یوه مسوده ښيي چې که کوم هېواد غواړي له درې کالو څخه زیات د غړو په توګه پاتې شي، باید یو میلیارد ډالر مرسته وکړي.
یو شمېر اروپايي مشران اندېښمن دي، چې د ټرمپ د سولې بورډ به د ملګرو ملتونو رول تر سیوري لاندې راولي، له همدې امله یې تر دې مهاله له دغه وړاندیز سره محتاطانه چلند کړی.
