د طالبانو ماليې وزارت خبرداری ورکړی، چې د روانې سلواغې میاشتې تر ۱۹مې نېټې وروسته له پاکستان نه هر ډول وارېدوونکي درمل نه محصولېږي. دغه وزارت (د سلواغې لومړۍ نېټه) د یوې خبرپاڼې په خپرولو سره ویلي، چې دغه پرېکړه د طالبانو د ریاستالوزرا اقتصادي معاونیت په سپارښتنه شوې ده.
په خبرپاڼه کې راغلي، ټول هغه سوداګر چې له پاکستان نه د درملو واردولو په کاروبار بوخت دي؛ باید تر راتلونکو ۱۹ ورځو پورې خپلې ټولې سوداګریزې معاملې تصفیه کړي. یاد وزارت ټینګار کړی، تر دې وړاندې هم سوداګرو ته سپارښتنه شوې وه چې د درېیو میاشتو په موده کې دې له پاکستان سره خپلې سوداګریزې معاملې پای ته ورسوي.
د طالبانو د مالیې وزارت په وینا؛ د یادې ټاکلې مودې یوازې ۱۹ ورځې پاتې دي او له ټاکل شوې نېټې وروسته به د افغانستان په ګمرکونو کې د پاکستان درمل محصول نهشي. دغه پرېکړه په داسې حال کې کېږي، چې تر دې وړاندې د پاکستان او طالبانو ترمنځ د وروستیو سیاسي او سوداګریزو ترینګلتیاوو او د ترانزیتي لارو د تړل کېدو له امله د طالبانو د ریاستالوزرا اقتصادي مرستیال عبدالغني برادر سوداګرو ته د درېیو میاشتو ضربالاجل ټاکلی و؛ څو له پاکستان سره خپلې ټولې سوداګریزې معاملې تصفیه کړي.
