د ناټو سرمنشي د امریکا له ولسمشر سره په کتنه کې ټینګار وکړ، که پر امریکا برید وشي، د دې پوځي تړون متحدین د واشنګټن ترڅنګ درېږي. نوموړي د افغانستان جګړې ته په اشارې وویل، ناټو لکه څنګه چې د سپټمبر له ۱۱مې وروسته د امریکا ملاتړ وکړ، اوس هم د دفاع لپاره خپلې ژمنې ته وفاداره ده.
دا لیدنه د چهارشنبې په ورځ د داووس غونډې په څنډه کې وشوه. روټه هڅه وکړه، چې د امریکا له دفاع څخه د اروپایي متحدینو د ژمنتیا په اړه د ټرمپ اندېښنې لرې کړي. د ناټو سرمنشي د دغه تړون د غړو ترمنځ پوځي همکاریو مخینې ته په اشارې وویل، چې دوه اړخیزه ژمنتیا لا هم پر خپل ځای ده.
روټه ټرمپ ته ور یاده کړه، چې د سپټمبر د یوولسمې له بریدونو وروسته د ناټو متحدین د امریکا د دفاع لپاره افغانستان ته ولاړل او د دوی یو شمېر سرتېري هېڅکله بېرته خپلو کورونو ته ستانه نه شول. هغه وویل: «د هرو دوو امریکایانو په بدل کې چې خپل ژوند یې له لاسه ورکړی، په افغانستان کې د ناټو د نورو غړو هېوادونو یو سرتېری هم وژل شوی دی».
د یادولو ده، چې د ۲۰۰۱ کال د سپټمبر د ۱۱مې له بریدونو وروسته متحده ایالاتو د القاعده د بریدونو په ځواب کې پر افغانستان برید وکړ. طالبانو د القاعده د مشر اسامه بن لادن له سپارلو ډډه وکړه او امریکا د ناټو له متحدینو سره یوځای پراخ پوځي عملیات پیل کړل، چې د طالبانو د حکومت د پرځېدو لامل شو. د ناټو ځواکونو نږدې ۲۰ کاله په افغانستان کې د امریکایي ځواکونو ترڅنګ شتون درلود.
د ناټو سرمنشي د امریکا ولسمشر ته په خطاب کې وویل: «تاسو بشپړ ډاډمن اوسېدلی شئ؛ که یوه ورځ پر متحده ایالاتو برید وشي، ستاسو متحدین به ستاسو ترڅنګ ولاړ وي. دا یو مطلق ضمانت دی او غواړم دا خبره په ښکاره او صریح ډول وکړم، ځکه دا یوه مهمه موضوع ده».
ټرمپ په غبرګون کې وویل، چې د دغو څرګندونو درناوی کوي او هیله لري چې دا ژمنه په عمل کې هم پلي شي. نوموړي د روټه په اړه د یوه خبریال د پوښتنې په ځواب کې وویل: «هغه یو ښه سړی دی او تر اوسه یې ماته هېڅکله درواغ نه دي ویلي.
ټرمپ همدا راز زیاته کړه: «یوازې دا چې کله وینم د ګرینلنډ په اړه څه روان دي، په فکر کې ډوبېږم».
