ټرمپ: حماس باید خپلې وسلې وسپاري او که نه له منځه به یووړل شي
د امریکا ولسمشر ډونالډ ټرمپ د چارشنبې په ورځ وویل چې په راتلونکو دریو اونیو کې به څرګنده شي چې ایا د فلسطین وسله واله ډله خپلې وسلې سپاري که نه، او خبرداری یې ورکړ چې که یاده ډله دا کار ونه کړي، نو پر ضد به یې اقدام وشي.
ټرمپ دا څرګندونې د سویس په داوس ښار کې د نړیوال اقتصادي فورم له غونډې وروسته د پوښتنو او ځوابونو پر مهال وکړې.
هغه وویل: «دا هغه څه دي چې هغوی پرې هوکړه کړې ده. هغوی باید دا کار وکړي. او موږ به په راتلونکو دوو یا دریو ورځو کې او حتمي په راتلونکو دریو اونیو کې پوه شو چې ایا دوی دا کار کوي که نه.»
ټرمپ زیاته کړه: «که هغوی دا کار ونه کړي، نو ډېر ژر به له منځه یووړل شي. هغوی به ډېر ژر ختم شي.»
