د ازاده سیالیو سازمان اېفاېنسي (Fight Nation Championship) ویلي، چې د افغانستان د ګډو رزمي هنرونو لوبغاړي واحدالله نژند سره یې قرارداد لاسلیک کړی. دغه سازمان ویلي، نژند به د «اېفاېنسي» تر ټولو سختو وزنونو کې یعنې د منځني وزن په کټګورۍ کې د سیالۍ لپاره میدان ته ولاړ شي.
واحدالله نژند په خپل مسلکي بهیر کې ۱۲سیالۍ ترسره کړې، چې له دې ډلې ۱۰ بریاوې او ۲ ماتې لري. هغه تر دې وړاندې د «اوکتاګون» په سازمان کې پرلهپسې بریاوې ترلاسه کړې وې او ان د خپل وزن په کټګورۍ کې د همدې سازمان د غوره لوبغاړي په توګه هم ټاکل شوی و.
د «اېفاېنسي» سازمان همدارنګه ویلي، چې نژند په خپلو وروستیو څلورو سیالیو کې څلور پرلهپسې بریاوې ترلاسه کړې دي او کولای شي د دغه سازمان سیالیو ته لا زیات شور او ځوږ ور وبښي.
سره له دې چې د «اېفاېنسي» سازمان ۲۷م پړاو سیالۍ د ۲۰۲۶کال د فبرورۍ په ۷مه نېټه (۱۸ ورځې وروسته) د جرمني په مونیخ ښار کې ترسره کېږي؛ خو تر اوسه د واحدالله نژند سیال په رسمي ډول نهدی اعلان شوی.
واحدالله نژند چې د افغانستان د ازاده سیالیو له مخکښو څېرو ګڼل کېږي، خپله وروستۍ سیالي د ۱۴۰۴ لمریز کال د چنګاښ په ۷مه نېټه د جرمني په هامبورګ ښار کې د تاجکي سیال شوخنظروف پر وړاندې ترسره کړه. نژند په دغه سیالۍ کې سره له دې چې سخت ټپي شوی هم و، وتوانېد خپل سیال د «کېمورا» سبمېشن فن پر مټ مات کړي او بریا ترلاسه کړي.
