اسټرالیایي سناتوره: د ایران خلک د خپل هېواد د تاریخ په یوه مهم پړاو کې دي
اسټرالیایي سناتورې کلیر چنډلر له ایران انټرنشنل سره په مرکه کې اوسنی وضعیت د ایران په تاریخ کې یو برخلیک ټاکونکی پړاو وباله. نوموړې د انټرنېټ پرې کېدو او د لاریونوالو د ځپلو راپورونو ته په اشارې سره وویل: «دغه ډول اقدامات دا په ډاګه کوي، چې ایران د یوه بدلون په حال کې دی».
هغې زیاته کړه:« لوېدیځه نړۍ په ځانګړې توګه امریکا او ولسمشر ټرمپ په بشپړې ځېرنې دغه موضوع څاري او د بدلون امکان په رښتیني توګه جدي نیسي، دا په خپله یو ښه پرمختګ دی. موږ باید تر خپلې وسې هر هغه اقدام وکړو، چې د ایران له خلکو سره د یوه سخت او کرغېړن رژیم پرضد په لویه مبارزه کې مرسته وشي».
هغې د ایراني خلکو زړورتیا وستایله، چې د رژیم د اوږدمهاله ظلم په وړاندې درېدلي. نوموړې د ایران خلکو ته په خطاب کې وویل: «تسلیم نه شئ، ځکه چې اوس د ایران په تاریخ کې یوه نه هېرېدونکې شېبه ده».
