د افغانستان کرېکټ ملي لوبډلې له وېسټ انډیز څخه د درې شل اوریزو سیالیو لوبلړۍ وګټله
د افغانستان او وېسټ انډیز د کرېکټ ملي لوبډلو ترمنځ د درې شل اوریزو نړۍوالو سیالیو لوبلړۍ ۲ـ۱ د افغان لوبډلې په بریا پایته ورسېده او ورسره یې دغه لوبلړۍ په خپل نوم کړه.
د افغانستان او وېسټ انډیز د کرېکټ ملي لوبډلو تر منځ د درې شل اوریزو نړۍوالو سیالیو لوبلړۍ وروستۍ لوبه کې وېسټ انډیز لوبډلې افغان لوبډلې ته د ۱۵ منډو په توپیر ماتې ورکړه، خو دوه مخکینۍ لوبې افغان لوبډلې ګټلې وې.
د نن لوبې پچه افغان لوبډلې وګټله او لومړۍ یې د توپ اچونې پرېکړه وکړه.
د ویسټ انډیز لوبډلې د لوبې په لومړۍ برخه کې د ۷ لوبغاړو په سوځیدو سره ۱۵۱ منډې جوړې کړې او افغان لوبډلې ته یې د ۱۵۲ منډو هدف وټاکه.
په توپ اچونه کې د افغان لوبډلې په ګټه راشدخان، عبدالله احمدزي او ضیاء شریفي ۲ـ۲ ویکټې ترلاسه کړې.
د لوبې په دویمه برخه کې د افغان لوبډلې توپ وهنه د تېرو دوو لوبو پرتله د پام وړ نهوه او یوازې رحمان الله ګربز پهکې ۷۱ منډې جوړې کړې.
افغان لوبډله د ۲۰ اورونو په لوبولو سره ونه توانېدل چې د ۱۵۲ منډو هدف پوره کړي او لوبه یې د ۱۵ منډو په توپیر وېسټ انډیز ته پرېښوده، خو د مخکنیو دوو لوبو د ګټلو له امله یې د لوبلړۍ جام په خپل نوم کړ.
