د ترکیې په دوو ښارونو کې ۷ افغان پناه غوښتونکي نیول شوي
د ترکیې د اماسیا ښار پولیس وایي چې هغه پنځه افغانان یې نیولي چې د یوه موټر په صندوق کې پټ شوي وو. همداراز د توکات ښار پولیسو هم د یوه باروړونکي موټر له دننه د دوو نورو افغان پناه غوښتونکو د نیولو خبر ورکړی دی.
د ترکیې رسنیو د جمعې په ورځ راپور ورکړی چې دغه افغان کډوال د اداري چارو تر بشپړېدو وروسته، د افغانستان پر لور د ایستلو په موخه د اړوندو ښارونو د کډوالۍ ادارو ته سپارل شوي دي.
د اماسیا او توکات ښارونو پولیسو ویلي، چې د قانوني اسنادو نه لرونکو پناه غوښتونکو د لېږد په تور یې دوه نور کسان هم نیولي او عدلي ارګانونو ته یې معرفي کړي دي.
په وروستیو میاشتو کې د قانوني اسنادو نه لرونکو افغانانو نیول په ترکیه کې چټک شوي او نږدې هره ورځ د دغه هېواد له بېلابېلو ښارونو د ورته پېښو راپورونه د رسنیو لهخوا خپرېږي.
