تېره ورځ د خیبرپښتونخوا په کوهاټ ولسوالۍ کې پولیسو د افغان کډوالو له مشرانو سره په یوې جرګه کې له دوی غوښتنه کړې، چې په دغه ولسوالۍ کې مېشت ټول بېاسناده افغان کډوال دې په خپله خوښه بېرته افغانستان ته ستانه شي.
په یادې ولسوالۍ کې د پولیسو مشر بېدار بخش افغان کډوالو ته څرګنده کړې، چې دا د بېرته ستنېدو لپاره د افغان کډوالو وروستی فرصت دی او له هغې وروسته به د بېاسناده افغان کډوالو پرضد د پاکستان حکومت پالیسۍ له مخې چلند وشي.
هغه ټینګار کړی، چې دغه کډوال د ویزو ترلاسه کولو وروسته بېرته پاکستان ته سفر کولای شي.
له بل پلوه د خیبر پښتونخوا د کورنیو او قبایلي چارو وزارت خبر ورکړی، چې تر دې دمه یوازې له دغه ایالت څخه ۹۸۸زره او ۸۱۲ افغانان بېرته افغانستان ته ستانه شوي دي. د یاد وزارت په وینا؛ دغه کډوال د بېاسناده کډوالو د بېرته ستنېدو په اړه د پاکستان حکومت تر اعلان وروسته افغانستان ته ستانه شوي دی.
د ورکړل شویو شمېرو له مخې؛ د بېرته ستنو شویو کسانو له ډلې ۲۳۰زره او ۴۷۰کسان د «پي او ار» کارت لرونکي، ۷۱زره او ۵۷۰ کسان د افغانستان د پېژندپاڼو لرونکي او ۶۸۶زره او ۷۷۲ نور بیا بېاسناده افغانان دي.
