د طالبانو د اطلاعاتو او کلتور وزارت د خپرونو معین مولوي حیاتالله مهاجر فراهي وايي، د دوی د نظام ټول قوانین پر قرانکریم، حدیثونو او حنفي فقهې باندې ولاړ دي. د هغه په وینا، نظام یې یوازې د شرعي احکامو په پلي کولو پابند دی.
جمعه د (سلواغې ۳مه) پر اېکسپاڼه لیکلي، چې د دوی محاکمې د همدې شرعي قوانینو پربنسټ خپلې پرېکړې کوي. حیاتالله مهاجر فراهي وړاندې لیکي: «هغوی چې د نړۍوالو نورمونو او قوانینو رنګین شعارونه بدرګه کوي، همدا اصول دې د غزې پر ورانوونکو عملي کړي».
د دغه طالب چارواکي څرګندونې د ملا هبتالله له لوري د «جزایي اصولنامې» د توشېح شوي قانون په ملاتړ کې شوي دي. د طالبانو د مشر له لوري په دې تازه کړنلاره کې ملایانو ته له جزایي مسایلو څخه ځانګړی معافیت ورکړل شوی او پر عامو افغانانو برتر ګڼلي دي.
په دې کړنلاره کې بیا عامو افغانانو ته سختې سزاوې ټاکل شوي او د خلکو فردي ازادي او حقوق هم پهکې په لویه کچه سلب شوي دي. افغان سیاستوالو او حقوق پوهانو د ملا هبتالله دغه تازه کړنلاره د نړۍوالو قوانینو او انساني اصول خلاف بللې ده.
