د برېتانیا لومړي وزیر کېیر سټارمر د ډونالډ ټرمپ په نوښت د سولې په پلاوي کې د روسیې د شاملېدو د احتمال په اړه اندېښنه څرګنده کړه. هغه ویلي: «زه د سولې پلاوي کې د پوتین د حضور په اړه اندېښنه لرم». دا په داسې حال کې ده، چې ټرمپ روسیې ته د سولې پلاوي سره د یوځای کېدو بلنه ورکړې ده.
کېیر سټارمر ۴نیوز شبکې سره په یوه مرکه کې وویل، چې پوتین د یوه اروپايي هېواد سره د جګړې په حال کې دی؛« دوی په اوکراین بمبار کوي».
حماس د بېوسلې کولو غوښتنه رد کړې او اعلان یې کړی، که څه هم اوربند ته یې غاړه اېښې؛ خو هغه وخت حاضر دي چې ټولې هوکړې پر مخ یوسي چې اسراییلي پوځ په بشپړ ډول له غزې ووځي، لارې خلاصې او د سیمې د بیارغونې لپاره یوه ټولیزه لړۍ پيل کړي.
حماس په یوې اعلامیه کې د داووس اقتصادي فورم له ګډونوالو وغوښتل، چې د بشري مرستو د رسولو اسانتیا، له غزې د اسراييل ځواکونو د وتلو او د سیمې بیارغونې ته پام وکړي. حماس غوښتنه کړې، چې د «سولې کمېټه» دې د غزې د خلکو د ملاتړ او په سخت ژمي کې د بشري مرستو د زیاتولو لپاره اقدام وکړي.
د حماس ویاند حازم قاسم اسراییل تورن کړی، چې قصدا د امریکا ولسمشر ډونالډ ټرمپ لهخوا وړاندې شوي د سولې نوښتونه ناکاموي. هغه ټینګار کړی، چې «د مقاومت وسلې له پیل څخه د اشغال پر وړاندې د مبارزې او د خپل وطن او مقدساتو د دفاع لپاره ډیزاین شوې دي».
دغه دريځ په څرګند ډول د اسراییل د غوښتنې د رد معنا لري، چې د حماس د پوځي څانګو د بېوسلې کولو شرط د اوربند راتلونکو پړاوونو لپاره د مخکې شرط په توګه نهمني. په ورته وخت کې فلسطین حکومت ته نږدې رسنیو راپور ورکړی، چې د اسراییل پوځ د غزې په تړانګه کې لسګونه تاسیسات ویجاړ کړي، د سیمې په ختیځ کې یې د «ژېړ زون» په نوم پېژندل شوې امنیتي سیمه پراخه کړې او د خپلو ځواکونو لپاره یې لږترلږه شپږ ځایونه جوړ کړي.
د راپورنو له مخې؛ دا هغه اقدام دی چې د غزې په ځینو برخو کې یې د اسراییل د پوځي حضور د پیاوړتیا په اړه اندېښنې زیاتې کړې دي. په ورته وخت کې د همدې پرمختګونو سره ډونالډ ټرمپ د «سولې کمېټې» د پیل په مراسمو کې اعلان وکړ، چې امریکا به د بېلابېلو لوبغاړو په ګډون د ملګرو ملتونو سره همکارۍ ته دوام ورکړي.
د امریکا ولسمشر دغه ورځ «ډېره په زړهپورې» وبلله او ویې ویل، چې «د اوږدې مودې لپاره دې ته چمتوالی نیول شوی و» او غواړي په دغه کمېټه کې برخه واخلي. ټرمپ د غزې پر بېوسلې کولو ټینګار وکړ او ویې ویل، چې امریکا به په دې لاره کې «ډېره بریالۍ» وي او غزه به «په ښکلي ډول بیا ورغول شي».
فوربس مجلې راپور ورکړی، وروسته له هغه چې د فرانسې ولسمشر امانوېل مکرون د پنجشنبې په ورځ د داووس په سرمشریزه کې د وینا پرمهال لمریزې عینکې په سترګو کړې د دغه عینکو جوړونکي ايټالوي شرکت (ای وېژن ټېک) ونډه شاوخوا ۴.۱ مېلیون ډالرو ته لوړه شوې.
هغه عینکې چې د فرانسې ولسمشر په سترګو کړې وې او ډېر پام یې ځانته راواړاوه، په بازار کې شاوخوا ۷۷۵ ډالره پلورل کېږي. دغه عینکې د فرانسوي زاړه شرکت هنري جولېن تولید دی، چې په ۲۰۲۳کال کې اېټالوي شرکت ای ويژن ټېک واخیست.
د همدې اېټالوي شرکت مشر استېفانو فولکیر ګارډين ورځپاڼې ته ویلي، مکرون له ۲۰۲۴کال راهيسي دغه عینکې لري؛ کله چې هغه دغه عینکې د جي۲۰ په سرمشریزه کې د ډيپلوماتیک ډالۍ په توګه ترلاسه کړې او د ځان لپاره یې هم یوه جوړه واخیستې.
امانوېل مکرون دغه عینکې د دې لپاره په سترګو کړې، چې د خپلې سترګې ټپ پټ کړي. د فرانسې ولسمشر د پنجشنبې په ورځ د داووس په سرمشریزه کې د پاسیفیک اېس ۱ ډبل ګولډ عینکو په کارونې سره د خواله رسنیو کاروونکو پام ځانته راواړاوه.
د ایران د ملي هنرمندانو د همکارۍ کور (هما) له لوري د ۲۲۳ ایراني هنرمندانو یوې ډلې د برېتانوي موسقۍ پوه راجر واټرز څخه په یوه ګډ لیک کې غوښتنه کړې، چې په خپلې خبرې له سره غور وکړي او د تاریخ په دې مهم پړاو کې له ایراني ملت سره ودرېږي.
په دغه لیک کې د نړۍ پر مېلیونونه خلکو د راجز واټرز اغېزې ته په اشارې لیکل شوي، چې ایراني لاریون کوونکي «ژوند، ازادي او انساني وقار» غواړي او دغه غوښتنه یې د لیک مخاطب راجر واټرز ته یو امتیاز بللی.
راجر واټرز چې د پینک فلویډ ډلې پخوانی غړی دی، د جنورۍ په ۱۷مه په «پیرس مورګن بېسانسوره» پروګرام کې د مورګن د پوښتنو په ځواب کې د ایرانیانو د ملي انقلاب په اړه وویل، چې «د رژیم بدلون د ایران د خلکو غوښتنه نهده» او لاریون کوونکي یوازې د «اقتصادي ستونزو» لکه د انفلاسیون او د ملي اسعارو د ارزښت کمېدو له امله اعتراض کوي.
ایراني هنرمندانو هغه ته په یوه لیک کې ویلي: «موږ تاسو سره د موسیقۍ غږوونکو، سندرغاړو او شاعرانو په توګه خبرې کوو، چې غږونه یې خاموش شوي، پر کنسرټونه یې بندیز لګول شوی، وسایل یې مات شوي او سندرې یې تبعید شوې دي».
د لیک لاسلیکوونکو د ایران د ملي پاڅون په اړه د واټرز څرګندونې «ناسمې او د سپکاوي» وړ وبللې او لیکلي یې دي: «که تاسو په ډېر غور سره واورئ؛ نو تاسو به د ایران د کوچنیو او لویو ښارونو په سړکونو کې د خلکو غږونه واورئ، چې د دغه رژیم د پای ته رسېدو او د پهلوي کورنۍ د بېرته راستنېدو لپاره غږ اوچتوي. د زړور او لوی ایراني ملت اراده د اورېدو او درناوي وړ ده».
د امریکا ولسمشر ډونالډ ټرمپ ویلي، چې ولادیمیر پوتین د سولې بورډ سره د یو ځای کېدو لپاره خپله کنګل شوې شتمني کاروی. نوموړي ویلي:« که هغه خپلې پیسې کاروي دا ښه خبره ده. زما په اند ترټولو مهمه دا ده، چې په دغه بورډ کې ټول برخه واخلي».
د روسیې ولسمشر ولادیمیر پوتین د چهارشنبې په ورځ په کرملېن ماڼۍ کې د فلسطین له ولسمشر محمود عباس سره د لیدنې پر مهال ویلي و، د امریکا د ولسمشر ډونالډ ټرمپ هغه بلنه مني چې لهمخې یې روسیه د «غزې د سولې بورډ» غړیتوب ترلاسه کوي.
پوتین په دغه لیدنه کې ټینګار کړی و، چې د سولې له پلاوي سره د روسیې د یوځای کېدو اصلي موخه د فلسطیني ولس د ګټو خوندي کول او ملاتړ دی او همداراز به د غړیتوب لپاره بورډ ته یو مېلیارډ ډالر هم ورکړي.
روسیې ویلي، دغه پیسې به له هغو روسي شتمنیو ورکړي چې دا مهال په متحده ایالاتو کې کنګل شوې دي. د دې کار عملي کېدل د امریکا د حکومت پرېکړې او اقدام ته اړتیا لري؛ څو دغه شتمنۍ ازادې شي.
د پاکستان په کراچۍ ښار کې د ګل پلازې په نوم په یوه سوداګریز مارکېټ کې د پراخې اورلګېدنې له امله د مړو شمېر ۶۷ ته رسېدلی، چې تر دې مهاله یوازې د ۱۷ کسانو جسدونه پېژندل شوي دي. که څه هم له یادې پېښې شاوخوا ۶ ورځې تېرېږي؛ خو لاهم ۷۷ کسان تري تم دي.
د پاکستان جیونیوز رسنۍ جمعه (د سلواغې ۳مه) په یوه راپور کې ویلي، چې د کراچۍ ښار ګل پلازې ته څېرمه د لادرکه شویو کسانو د کورنیو او خپلوانو له لوري لاریونونه پيل شوي دي. د قربانیانو کورنۍ د حکومت له لوري د ژغورنې او پلټنې پر عملیاتو نیوکه کوي او وايي، چې د اورلګېدنې له پېښې ۶ ورځې تېرېږي؛ خو لا هم ۷۷ کسان تري تم دي.
د ژغورنې ډلې بیا وایي، د سوځېدلې ودانۍ د نړېدو له وېرې ماشینري د لنډمهال لپاره درول شوې او په نړېدلو برخو کې د تري تم شویو کسانو پلټنه ستونزمنه شوې ده. خو د پاکستان حکومت وایي، د تري تم شویو کسانو د موندلو هڅې یې چټکې کړې دي. په ګل پلازه کې دغه اورلګېدنه د تېرې شنبې په شپه رامنځ ته شوې وه.
د پاکستان حکومت ویلي، چې د پېښې اړوند یې د عیني شاهدانو او اغېزمنو کسانو د څرګندونو پر بنسټ لومړنی راپور چمتو کړی. په راپور کې راغلي: « په ګل پلازه کې اور د مصنوعي ګلونو په یوې هټۍ کې د ماشومانو د لوبېدو پر مهال بل شوی و. ښایي ماشومانو په دغه هټۍ کې له اورلګېد یا هم لایټر سره لوبې کولې، چې له امله یې په دغه هټۍ کې اور بل شوی او وروسته بیا د برېښنا مزو ته رسېدلی».
