د تیراه اوسېدونکي: بېځایه شوي په واورو کې بند پاتې دي خو پوځ د سیمو پر پرېښودو ټینګار کوي
د خیبر ولسوالۍ د تیراه درې یو شمېر اوسېدونکو افغانستان انټرنشنل – پښتو ته په استول شویو پیغامونو کې ویلي، چې د وروستۍ سختې واورې ورېدو له امله ګڼ داخلي بېځایه شوي کسان په واورو کې بند پاتې دي او له بلې خوا پرې پوځ فشار راوړي چې سیمې پرېږدي.
د سیمې اوسېدونکي وايي، چې د خراب موسم، تړلو لارو او یخنۍ له امله د کورنیو لېږد له جدي ستونزو سره مخ دی او ډېری خلک لا هم خوندي ځایونو ته نه دي رسېدلي.
د سیمې اوسیدونکی اشرف خان په یو غږیز پیغام کې وايي چې یو شمېر کورنۍ په واورو کې بندې پاتې دي او د حکومت له خوا د ژغورنې عملیات هم په ډېرې سستۍ سره روان دي.
بل لور ته، د خیبر ولسوالۍ مرستیال کمېشنر بلال شاهد وايي، چې د تیراه درې په بېلابېلو سیمو کې بند پاتې شویو داخلي بېځایه شویو کسانو د خوندي ځایونو پر لور د لېږد لپاره د ژغورنې عملیات روان دي. د نوموړي په وینا، دا عملیات د دوی تر څار لاندې پر وخت ترسره شوي، چې له امله یې ټولې اغېزمنې کورنۍ خوندي پاتې شوې دي.
د مرستیال کمېشنر د معلوماتو له مخې، د مرستندویه توکو یو کاروان د شپې لهخوا پاینده چینې ته رسول شوی او بندې پاتې کورنۍ د همدې سیمې ښوونځیو ته لېږدول شوې دي.
د نوموړي په وینا، په تیراه دره کې د سختې واورې او باران له امله شاوخوا سل موټرې پر سړکونو بند پاتې شوې وې او د ژغورنې عملیات ترسره شوي دي.
دا په داسې حال کې ده، چې د پاکستان پوځ په دې وروستیو کې د تیراه اوسېدونکو ته امر کړی چې خپلې سیمې پرېږدي، تر څو دوی په سیمه کې د وسله والو ډلو پر وړاندې پوځي عملیات وکړي.
