په چترال کې د واورې ښوېدنې له امله ۹ کسان مړه شوي
د خیبر پښتونخوا د چترال ولسوالۍ د ډومېل په سیمه کې پر یوه کور له غره واوره راښویېدلې ده، چې له امله ۹ کسان مړه شوي او یو ماشوم ټپي شوی دی.
د چترال د مرستیال کمېشنر دفتر د معلوماتو له مخې، پېښه هغه مهال رامنځته شوه چې د ډومېل په سیمه کې پر یو استوګنځي ناڅاپه واوره را وښویېده. د چارواکو په وینا، په مړه شویو کسانو کې ۴ ښځې او ۵ نارینه شامل دي او د ټولو مړو شوو جسدونه له واورو ایستل شوي دي.
بل لور ته، د خیبر ولسوالۍ د تیراه درې په بېلابېلو سیمو کې د وروستۍ سختې واورې ورېدو له امله بند پاتې شوي داخلي بېځایه شوي کسان خوندي ځایونو ته د لېږد لپاره د ژغورنې عملیات روان دي.
د خیبر مرستیال کمېشنر بلال شاهد ویلي، چې د ضلعي د ادارې تر څار لاندې پر وخت اقدامات شوي، چې له امله یې ټول اغېزمنې کورنۍ خوندي پاتې شوې دي.
په وروستیو کې په افغانستان او پښتونخوا د درنو ورښتونو څپه راغلې، چې په بېلابېلو سیمو کې یې د ځاني زیانونو تر څنګ مالي زیانونه هم اړولي دي.
