د طالبانو د ټولګټو چارو وزارت ویاند محمداشرف حق شناس ویلي، د سالنګ په دوشاخ سیمه کې د واورې ښویېدنې او توپان له امله یو هوټل او څو هټۍ تر واورو لاندې شوې چې له امله یې دوه کسه مړه او ۱۲ نور ټپيان شوي دي. هغه ویلي، چې ژغورونکو ډلو ګڼ کسان ژغورلي هم دي.
محمد اشرف حق شناس د جمعې په ورځ (د سلواغې ۳مه) ویلي، چې په ټپیانو کې د ۶ کسانو روغتیايي حالت نازک ښودل شوی. نوموړي زیاته کړې، چې په ځينو سیمو او په ځانګړې توګه سوېلي سالنګ کې توپانونه او تېز بادونه لاهم دوام لري او په سیمه کې ژغورونکې ډلې لا هم د خلکو په ژغورولو بوختې دي.
طالبانو دارنګه له خلکو غوښتي، چې د سختې واورې او نامناسبې هوا پرمهال دې پر نامعلومو لارو له سفر کولو ډډه وکړي.
له بل پلوه د طالبانو تر واک لاندې له پېښو سره د مبارزې او چمتووالي ادارې ویلي، چې په پروان، بامیان، میدان وردګ، کندهار، جوزجان، نورستان او فاریاب ولایتونو کې د درنو واورو او بارانونو له امله ۱۳ کسان مړه او پنځه نور ټپیان شوي دي.
