د خېبرپښتونخوا اعلی وزیر سهیلخان اپريدي وايي، حکومت یې د کانونو مافیا د لاسونو د لنډولو لپاره د کان کېندنې شرکت جوړوي. د نوموړي په وینا، د دغې چارې د پیلولو لپاره قانوني چارې په بشپړېدو دي.
سهیلخان اپريدي د جمعې په ماخوستن (د سلواغې ۳مه) په خپله اېکسپاڼه ویلي، د کابینې د پرېکړې لهمخې به د «خېبرپښتونخوا د منرالونو پراختیا» په نوم شرکت جوړ کړي، څو د پښتونخوا خلک له خپلو ارزښتناکو کاني سرچینو استفاده وکړي.
د اپریدي په وینا، د یادې کمپنۍ د چارو په پیلېدو سره به د ناقانونه کان کېندنو مخه ونیول شي او همداراز به د کاني مافیاوو لاسونه هم لنډ شي.
هغه ویلي، په دې اړه د خلکو په منځ کې ابهامات او شکونه راپورته شوي، نو د ځايي خلکو د باور تر ترلاسه کولو پورې د یاد شرکت د جوړونې او قانوني بهیر د بشپړولو چارې دروي، خو هغه د دغو رامنځته شویو ابهاماتو او شکونو په تړاو نور جزییات نهدي ورکړي.
د یادونې وړ ده، چې تر دې مخې د خېبرپښتونخوا حکومت د انرژۍ، تېلو او ګازو لپاره خپله کمپنۍ د KPOGCL په نوم جوړه کړې ده.
