د طالبانو د کار او ټولنیزو چارو وزارت له کاري شریکانو او خصوصي سکټور سره د کارګرو د کاري حقونو د خوندینې په تړاو غونډه کې د کارګرانو حقونو پر ټینګښت ټینګار کړی، خو د خصوصي سکټور یو شمېر کارګر د خپلو بنسټونو لهخوا د کاري چاپېریال او همداراز پر وخت د تنخواوو له نهورکړې شکایت لري.
د طالبانو د کار او ټولنیزو چار وزارت د قواعدو او د کار شرایطو د ښهوالي رييس حسین احمد مدني په دې غونډه کې وویل، له همکارو او غېر دولتي ادارو سره په همغږۍ هڅې کوي، چې کارګرو او کارکوونکو ته خوندي کاري چاپېریال برابر کړي، عادلانه مزد تعیین کړي او په ټوله کې د کارګرانو حقوق تامین کړي.
دغه وزارت د جمعې په ورځ (د سلواغې ۳مه) د یوې خبرپاڼې په خپرولو سره ویلي، د کار عالي شورا په تخنیکي غونډه کې په هېواد کې د کار بازار د اړتیاوو، د وزارتونو او خصوصي سکټور ترمنځ په غوره همغږۍ، د تولیدي ظرفیتونو په لوړولو،د کار اړوند تقنیني اسنادو، مقرراتو او طرزالعملونوله تطبیق څخه د څار، د کاري چاپېریال د خونديتوب او غورهوالي، د کارګر او کار فرما ترمنځ د غوره کاري اړیکو، د نړۍوالو کاري معیارونو تطبیق، د کار بازار د تنظیم او د کارګرو د مزد او د مزد څرنګوالي په اړه هم خبرې شوې دي.
دا په داسې حال کې ده، چې د طالبانو په اداره او خصوصي سکټور کې کارکوونکي د تنخواوو له ځنډېدو او همداراز په تنخواوو کې د توازن له نشتوالي شکایت لري.
