د ایران د ټولنپوهنې سازمان د مدیره پلاوي د شنبې په ورځ (د سلواغې ۴مه) په یوه بیانیه کې د سراسري اعتراضونو پر مهال د زرګونو کسانو وژل کېدو ته په اشارې سره، ولیکل: «د دې پېښې انساني، ټولنیز او سیاسي اړخونو ټولنه په یوه ژور اندېښمن حالت کې اچولې ده».
په دغه بیانیه کې ویل شوي: «په تېرو کلونو کې د اقتصادي، سیاسي او ټولنیزو برخو شنونکو په وار وار د کړکېچونو د رامنځته کېدو او د ناسمو لارو د دوام د پایلو په اړه خبرداری ورکړی و او یوې داسې نقطې ته د ټولنې د رسېدو په اړه ګواښ کړی و، چې نن یې شاهدان یو؛ هغه خبرداری چې په عمومي ډول له جوړښتي بېتفاوتۍ سره مخ شول».د ایران د ټولنپوهنې سازمان مدیره پلاوي پر دې باندې په ټینګار سره چې «یوازې د روایت جوړونې او د خبرو اترو د کنټرول له لارې د کړکېچ د مدیریت امکان عملاً له منځه تللی»، زیاته کړه: «ټولنه د زیاتېدونکي تاوتریخوالي یوې داسې کړۍ ته داخله شوې؛ داسې یوه کړۍ چې نه یوازې انساني امنیت، بلکې د ایران د خاورې راتلونکی لیدلوری یې هم له جدي ابهام او وېرې سره مخ کړی دی.»د بیانیې پر بنسټ: «د دې بهیر دوام، له لنډمهاله پړاوونو پورته پایلې لري او د ټولنیز پیوستون او عامه باور بنسټونه په سختۍ سره له منځه وړي».د ایران د ټولنپوهنې سازمان مدیره پلاوي د «تاوتریخوالي پر درولو او په وهل شویو لارو کې پر جدي بیا کتنې» ټینګار وکړ او ویې لیکل: «په ژورې اندېښنې سره د پراخو تاوتریخوالو دوام او د څو زره انسانانو وژل کېدل چې د پام وړ برخه یې بېدفاع ملکي وګړي وو، یو ژور انساني او د اندېښنې وړ ناورین بولي.»د بیانیې پر دوام کې راغلي دي: «هېڅ ډول سیاسي یا پوځي مصلحت نهشي کولای د انساني درد او ویجاړۍ د داسې یوې کچې توجیه کوونکی وي».د ایران د ټولنپوهنې سازمان مدیره پلاوي «د تاوتریخوالي په سمدستي درولو، د ملکي وګړو ژوند ته په اغېزمن درناوي او د بشري حقونو او نړۍوالو بشردوستانه حقونو پېژندل شویو اصولو ته په عملي ژمنتیا» ټینګار وکړ او ویې لیکل: «یوازې د عقلانیت، مسوولیت منلو او د ناخوښه (غېر تاوتریخوالي) حللارو موندلو لپاره د جدي هڅو له لارې کولای شو د دې ویجاړونکي څرخ د دوام مخه ونیسو».
