د افغانستان د اسنوبورډ فدراسیون اعلان وکړ، چې په هېواد په ځانګړي ډول کابل ښار کې د وروستیو واورو له ورېدو وروسته د اسنوبورډ لومړنی پروګرام د کابل په امید سبز ښارګوټي کې د غونډیو او غرونو پر لمنو ترسره شو. د فدراسیون د معلوماتو لهمخې، په دې پروګرام کې ۱۰۰ ورزشکارانو ګډون کړی و.
یاد فدراسیون وايي، چې د دې پروګرام موخه د ځوانانو ترمنځ د ژمنیو ورزشونو په ځانګړې توګه د اسنوبورډ معرفي او ترویج او په ټولنه کې د خوښۍ او لېوالتیا رامنځته کول وو.
دا په داسې حال کې ده، چې په تېرو لسیزو کې په افغانستان کې د ژمنیو ورزشونو د ودې لپاره په ځانګړې توګه په سړو او واوره لرونکو ولایتونو لکه بامیان کې د ځینو سیالیو د ترسره کېدو هڅو سره سره، دغه رشتې لکه اسنوبورډ، سکي او نورو څانګو یې تر اوسه کافي وده نه ده کړې او له محدودو امکاناتو سره مخ دي.
