د ملګرو ملتونو د بشري حقونو شورا د زرګونو ایرانیانو وژنه په کلکه وغندله
د ملګرو ملتونو د بشري حقونو شورا د خپلې ځانګړې ناستې په ترڅ کې د یوه داسې پرېکړهلیک په تصویبولو سره چې د څه باندې ۲۰ هېوادونو لهخوا وړاندې شوی و، په ایران کې د بشري حقونو وضعیت «سخت د اندېښنې وړ» وباله او د وروستیو سراسري اعتراضونو تاوتریخجن ځپل یې په کلکه وغندل.
دغه پرېکړهلیک چې د جمعې په ورځ (د سلواغې ۳مه) د ۷ منفي رایو په مقابل کې د ۲۵ هېوادونو په مثبتو رایو سره تصویب شو، د ملګرو ملتونو د حقیقت موندونکي پلاوي ماموریت د دوو کلونو لپاره او د ځانګړي راپور ورکوونکي ماموریت د یوه بل کال لپاره وغځاوه.
دغه پرېکړهلیک چې د ایرانیانو پر ملي انقلاب باندې په ځانګړي تمرکز سره تصویب شوی، د زرګونو سولهییزو اعتراض کوونکو په ځانګړې توګه د ښځو او ماشومانو د وژنې، د ګڼ شمېر وګړو د ټپي کېدو او د دغو اعتراضونو په ترڅ کې د زرګونو کسانو د خپلسري نیول کېدو او بندي کېدو خبر ورکوي.
د یادولو ده، چې د شورا له ۵۰ سلنې څخه زیاتو غړو د دغه پرېکړهلیک ملاتړ کړی دی. دا په داسې حال کې ده، چې دا یو له هغو لوړو کچو ملاتړ څخه دی چې په ایران کې د بشري حقونو د وضعیت په اړه یوه پرېکړهلیک تر اوسه د ملګرو ملتونو د بشري حقونو شورا په تاریخ کې ترلاسه کړی دی. یوازې یو ځل له داسې پرېکړهلیک څخه چې د ملاتړ کچه له دې څخه لوړه وه، ۲۰۱۳ کال ته ورګرځي.
له دې سره، د ایران د بشري حقونو په چارو کې د ملګرو ملتونو ځانګړي راپور ورکوونکي مای ساتو د سلواغې په دویمه اعلان وکړ، چې په سراسري اعتراضونو کې د وژل شویو کسانو شمېر ښايي له ۲۰ زرو څخه زیات وي.
