د طالبانو تر واک لاندې د کډوالو ستونزو ته د رسېدنې عالي کمېسیون وایي، د جمعې په ورځ ۴۴۹ کډوالې کورنۍ چې ټول ۲۵۱۵ کسان کېږي، له ایران او پاکستان نه افغانستان ته جبري ستنې شوې دي. د دغه کمېسیون د معلوماتو پر بنسټ، راستنو شویو کورنیو سره د اړتیا وړ مرسته هم شوې ده.
د دغه کمېسیون د راپور له مخې، دغه کډوال د ننګرهار تورخم، د کندهار سپین بولدک، د هلمند بهرامچې، د هرات اسلامکلا او د نیمروز ورېښمو پله له لارې ستانه شوي دي.
راپور زیاتوي، له یادو کورنیو څخه ۳۵۷ کورنۍ د تورخم له لارې، ۴۹ کورنۍ د سپین بولدک له لارې،۲۱ کورنۍ د ورېښمو پله له لارې، ۱۱ کورنۍ د بهرامچې له لارې او ۱۱ کورنۍ د اسلامکلا له لارې افغانستان ته ستنې شوې دي.
د طالبانو دغه کمېسیون وایي راستنو شویو کډوالو سره لومړۍ مرسته شوې او خپلو لایتونو ته خوندي لېږدول شوي دي.
