ټېلګراف راپور ورکړی، چې د ایرانیانو د ملي پاڅون پر مهال د زرګونو کسانو له وژل کېدو سره هممهاله، کارپوهانو د برېتانیا د دولت وزیرانو ته خبرداری ورکړی، چې په لندن کې مېشته د «اللولوه» شبکه د سپاه پاسداران د تبلیغاتو او د ایران د «پټ نفوذ» د عملیاتو برخه ده او باید وتړل شي.
په برېتانیا کې د افراطیت ضد مبارزې پخواني مسوول جان وودکاک ټېلګراف ته ویلي: «په هغو ټولنیزو پاڼو کې چې د اللولوه ټلوېزیون اړوند دي، د افراطیانو او احتمالاً مجرمانه منځپانګو خپرېدل دا ښيي چې افکام باید هر څه ژر د دغې شبکې رسنیز جواز لغوه کړي».
«اللولوه» ټلوېزیون چې د «شلز فور میډیا پروډکشن» شرکت یوه څانګه ده، په پیل کې د بحرین د حکومت د مخالفت په موخه پرانېستل شو او د لندن په شمال لوېدیځ کې د «ومبلي» له سیمې څخه اداره کېږي.
جان وودکاک زیاته کړه، برېتانیا باید د ایران حکومت د تبلیغاتو پر وړاندې جدي او سیستماتیک عمل وکړي؛ ځکه د اسلامي جمهوري نظام د «نرم ځواک» شبکه د برېتانیا او لوېدیځ پر وړاندې د هغوی د مبارزې یوه مهمه برخه ده چې باید مخنیوی یې وشي.
د دغه راپور پر بنسټ، اللولوه ټلوېزیون په خپلو انلاین خپرونو او ټولنیزو پاڼو کې په منظمه توګه د حماس او حزبالله د جګپوړو قومندانانو ستاینه کوي، قاسم سلیمانی ته د «شهید» خطاب کوي او د تهران د دیکتاتور علي خامنهيي یوه خطبه یې تبلیغ کړې ده.
په یمن کې د برېتانیا پخواني سفیر ایډمنډ فیټون براون ویلي، چې برېتانیا د اسلامي جمهوري نظام پر وړاندې «کمزوری» عمل کړی او ټینګار یې کړی، چې افکام باید له کومې زړه نازړهتوب پرته د دغې شبکې جواز لغوه کړي. همدارنګه، د امریکا پخواني استخباراتي افسر جاناټان هېکټ هم ویلي، چې د اللولوه ټلوېزیون په څېر شبکې د ایران له حکومت سره مستقیمې اړیکې لري او د ویجاړونکو نفوذي عملیاتو په اډانه کې فعالیت کوي.
د ټېلګراف د لیکنې لهمخې، د افکام چارواکي خبر دي چې اللولوه ټلوېزیون د «اسلامي راډیوګانو او ټلویزیونونو د اتحادیې» غړیتوب لري، خو دغه بنسټ اعلان وکړ، څرنګه چې دا شبکه په انلاین بڼه فعالیت کوي او د دوی تر څارنې لاندې د ټلوېزیوني لارښود په نوملړ کې نشته، نو ځکه د افکام د خپرونو د مقرراتو تر پوښښ لاندې نه راځي.
