د امریکا ځانګړی استازی: د اوکراین جګړې د پای ته رسولو په اړه درې اړخیزې خبرې «رغنده» وې
د امریکا ځانګړي استازي سټیو وېټکاف ویلي، چې د اوکراین د جګړې د پای ته رسولو په اړه د متحده عربي اماراتو په منځګړیتوب د امریکا، روسیې او اوکراین ترمنځ خبرې اترې «خورا رغنده» وې.
نوموړي پر خپلې اېکسپاڼې لیکلي، چې د عربي متحده اماراتو په منځګړیتوب د امریکا، اوکراین او روسیې ترمنځ دوه ورځینۍ درې اړخیزه ناسته پای ته رسېدلې ده.
سټیو وېټکاف یادې درې اړخیزې خبرې اترې «خورا رغنده» بللې دي.
نوموړي ویلي، چې په یاده ناسته کې پرېکړه شوې ده چې راتلونکې اوونۍ به هم یادو درې اړخیزو خبرو ته دوام ورکړل شي.
دا ناسته په داسې حال کې شوې، چې د اوکراین د جګړې د پای ته رسولو په اړه په نړۍواله کچه ډیپلوماتیک فشارونه زیات شوي دي او ټرمپ ژمنه کړې ده، چې یاده جګړه به ډېر ژر پای ته ورسوي.
