افغانستان د فوټبال فدراسیون د میدانونو د رغونې او پراختیا لپاره نوې پروژې ترلاسه کړي
د افغانستان د فوټبال فدراسیون اعلان وکړ چې د هرات، غزني او لوګر ولایتونو د فوټبال میدانونو د رغونې او د کندهار او بلخ د فوټبال پروژو قراردادونه ترلاسه شوي، چې د هېواد د فوټبال د پرمختګ او ځوانو لوبغاړو د استعدادونو د ودې لپاره مهم ګام ګڼل کېږي.
د افغانستان د فوټبال فدراسیون له خوا په خپره شوې خبرپاڼه کېراغلي، ددغه فډراسیون رییس محمد یوسف کارګر، چې د فیفا د تخنیکي او پرمختیایي کمېټې غړی هم دی، د مالیزیا په رسمي غونډه کې د اسیا د فوټبال کنفدراسیون (AFC) او د فیفا استازو سره وکتل.
یوسف کاګر ویلي: «موږ د افغانستان د فوټبال لپاره لومړني سترې پرمختیایي پروژې ترلاسه کړې. دا پروژې به زموږ ځوانانو ته د لوبې مناسب چاپېریال برابر کړي او د فوټبال کچه په هېواد کې لوړه کړي.»
خبرپاڼه زیاتوي، په دې غونډه کې د هرات او غزني ولایتونو د فوټبال میدانونو د رغونې او د لوګر ولایت د سپورتي میدان د جوړولو قراردادونه لاسلیک ته چمتو شوي، او د کندهار او بلخ ولایتونو فوټبال پروژې هم نهایي شوې.
کارګر ویلي: «دغه پروژې به ژر د رسمي قرارداد له لارې پیل شي او موږ هیله لرو چې په دې سره د افغانستان فوټبال په نوي پړاو کې وده وکړي.»
خبرپاڼه زیاتوي، د بدخشان ولایت د فوټبال سټېډیم د جوړولو او د کابل سټېډیم د رغونې موضوع هم د فیفا او AFC استازو سره وڅېړل شوه، او تمه کېږي چې په نږدې راتلونکي کې عملي شي.
د فدراسیون د خبرپاڼې په وینا، محمد یوسف کارګر د دې لاسته راوړنو په اړه وویل: «دا پروژې نه یوازې د لوبغاړو د روزنې او میدانونو د رغونې لپاره مهمې دي، بلکې د افغانستان د فوټبال راتلونکی هم تضمینوي او ځوانو لوبغاړو ته د پرمختګ زمینه برابروي.»
