سوریې او کرد ځواکونو اوربند د ۱۵ ورځو لپاره وغځوه ترڅو د داعش بندیان عراق ته ولېږدول شي
د سوریې حکومت او د کرد ځواکونو ترمنځ اوربند د شنبې په ورځ د ۱۵ ورځو لپاره وغځول شو. دمشق وایي دا پرېکړه د امریکا په ملاتړ د داعش بندیانو د سوریې له زندانونو څخه عراق ته د لېږد لپاره شوې ده.
د سوریې د دفاع وزارت په خبرپاڼه کې د اوربند تایید شوی. د کرد ځواکونو مشر پلاوی هم د اوربند د غځولو تصدیق کړی او ویلي یې دي چې دا پرېکړه د نړیوال منځګړیتوب له لارې شوې، او د دمشق سره خبرې لا هم روانې دي.
د کرد ځواکونو په خپره شوې خبرپاڼه کې ویلي چې «زموږ ځواکونه د اوربند د رعایت ژمنه کوي، چې له دې لارې د شخړې کمول، د ملکي وګړو ساتنه او د ثبات لپاره اړین شرایط رامنځته کېږي».
امریکا پلان لري شاوخوا ۷۰۰۰ داعش بندیان عراق ته ولېږدوي. د داعش لومړني لوړپوړي ۱۵۰ بندیان چې اروپایان هم پکې شامل وو، تېره چهارشنبه انتقال شوي، او د راپورونو له مخې د دویمې ډلې تر ۱۰۰۰ بندیانو پورې انتقالات د شنبې په ورځ پیل شوي.
