د ملګرو ملتونو د بشري مرستو د همغږۍ دفتر (اوچا) وایي، په کونړ ولایت کې د وروستۍ زلزلې له امله د زیانمنو شویو کورنیو خیمې د درنې واورې ورېدو له کبله ویجاړې شوې دي. اوچا زیاتوي، چې ساړه ژمي او سختو واورو زلزله ځپلې کورنۍ له شدیدو ستونزو او نوي ناورین سره مخ کړې دي.
اوچا نن د یکشنبې په ورځ ویلي چې د ژمي سختو شرایطو تر ټولو زیات زیانمن وګړي اغېزمن کړي دي. د یاد دفتر په وینا، سړې هوا، واورې او د سرپناه نشتوالي د زرګونو بېځایه شویو کسانو ژوند له جدي ګواښ سره مخ کړی دی.
په پیغام کې راغلي چې واورې ورېدو ګڼې مواصلاتي لارې بندې کړې دي، چې له امله یې ماشومانو او لويانو ته ګڼ امنیتي او روغتیایي ګواښونه پېښ شوي دي. همدارنګه، روغتیايي مرکزونو ته لاسرسی هم محدود شوی او دې چارې د ناروغانو او ټپیانو لپاره جدي ستونزې رامنځته کړې دي.
اوچا ټینګار کړی چې د اغېزمنو سیمو اوسېدونکي بېړنیو بشري مرستو ته سخته اړتیا لري او له مرستندویو بنسټونو یې غوښتي چې د ژمي له لا سختېدو مخکې خپلې مرستې چټکې کړي.
د یادونې وړ ده چې د کونړ په وروستۍ زلزله کې له دوو زرو زیاتو کسانو خپل ژوند له لاسه ورکړی او زرګونه کورونه یې په بشپړه یا نیمه توګه ویجاړ کړي دي، چې له امله یې ګڼې کورنۍ بېسرپناه پاتې شوې دي.
