ملاله یوسفزۍ: په پاکستان کې د ښځینه فعالانو نیول او سزاوې د بشري حقونو ښکاره سرغړونه ده
د سولې نوبل جایزې ګټونکې ملاله یوسفزۍ ویلي، چې په پاکستان کې د ښځو او د مدني ټولنې د فعالانو نیول او د ټولنیزو رسنیو د پوسټونو له امله تر لسو کلونو زیات بند باندې محکومول د بشري حقونو له بنسټیزو اصولو سره په ښکاره ټکر کې دي.
ملاله یوسفزۍ پر خپلې ایکس پاڼې لیکلي: «دا راته ژور اندېښمنوونکې ده چې په پاکستان کې ښځې او د مدني ټولنې فعالان یوازې د ټولنیزو رسنیو د پوسټونو له امله نیول کېږي او تر لسو کلونو زیات بند سزاوې ورکول کېږي. دا د بنسټیزو بشري حقونو ښکاره سرغړونه او زموږ د بنسټګرو له لیدلوري څخه څرګند واټن دی.»
نوموړې ټینګار کړی چې د پاکستان له ښځینه فعالانو او مدني ټولنې سره ولاړه ده او له قوانینو، بنسټونو او واکمنو جوړښتونو څخه د عدالت غوښتنه کوي.
هغې لیکلي: «عدالت باید خلکو ته ورسېږي، په ځانګړي ډول هغو تر ټولو زیانمنو کسانو ته او هغو ته چې د دوی تر څنګ درېږي.»
